Օտարերկրյա մի քանի քաղաքների հետ բարեկամության պայմանագրեր կնքած Աշտարակ քաղաքն իր արտասահմանցի քույր քաղաքներին առաջարկում է համագործակցություն զբոսաշրջության, մշակույթի, սոցիալ-տնտեսական եւ այլ ոլորտներում: Եթե համագործակցությունը ստացվի, ինչպես որ ծրագրել է Աշտարակի քաղաքապետարանը՝ ի դեմս քաղաքապետ Արմեն Անտոնյանի, ապա օտարերկրացի հյուրերին Աշտարակում, բացի հիացմունքից, հիասթափություն էլ է սպասվում:
Աշտարակի քաղաքապետարանը արդեն քանի տարի է՝ ոչ մի կերպ չի կարողանում լուծել օդերեւութաբանական կայանի տարածքում կուտակված աղբի հարցը:
Տարածքի բնակիչները տարիներ շարունակ դիմումներ են հղում Աշտարակի քաղաքապետարան, սակայն աղբը տեղից չի շարժվում:
Կենցաղային աղբին խառնված է նաեւ շինարարական աղբը. ամեն անգամ, երբ բնակիչները խնդիրը բարձրաձայնում են, աղբահավաք մեքենաների վարորդները պատճառաբանում են, որ շինաղբը տանել չեն կարող, բայց բնակիչների խոսքերով՝ կենցաղային աղբն էլ չեն տանում: Եթե տանում էլ են, ապա կրկին հավաքվում է: Նրանց պատմելով՝ այդ թաղամասով աղբի մեքենան շաբաթը մեկ է անցնում, եւ որպեսզի տանը կուտակված աղբից բնակիչներից ոմանք ազատվեն, ստիպված նշյալ տարածքում են աղբը թափում: Աղբարկղ տարածքի բնակիչների համար նախատեսված է, բայց այն, ինչպես նրանք են ասում, բավականին հեռու է գտնվում իրենց տներից:
Քաղաքապետարանն այդ տարածքում մի անգամ փորձել է աղբարկղեր տեղադրել, սակայն որոշ ժամանակ անց հանել է, քանի որ, ինչպես մեզ հետ զրույցում աշտարակցիները նշեցին՝ իրավիճակն ավելի անտանելի է դարձել:
Մեկ-երկու անգամ էլ տարածքում բռնկված հրդեհն է փորձել աղբի «հախից» գալ, սակայն հրշեջները հրդեհը մարել են, ու աղբի մնացորդները կրկին «ջրի երես» են բարձրացել:
Հարեւանությամբ ապրող բնակիչների խոսքերով՝ ամռան այս սեզոնին, բացի այն, որ հակահիգիենիկ վիճակ է տարածքում, անտանելի հոտ է գալիս, ու աղբատեղին վարակների աղբյուր է, կրծողներն ու մորմերն այնքան են բազմացել, որ լցվում են մարդկանց տները:
ԼՈՒՍԻՆԵ ԲՈՒԴԱՂՅԱՆ
«Առավոտ»
07.07.2016
