Հուլիսի 6-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Մարսելի համազգային դպրոցի և Փարիզի «Դպրոցասեր» վարժարանի թվով 26 աշակերտների` ուղեկցությամբ ֆրանսիաբնակ ազգային բարերար Սարգիս Պետոյանի:
Ամենայն Հայոց Կաթողիկոսն ուրախություն հայտնեց Ֆրանսիայում գործող այս երկու հայկական դպրոցների աշակերտների` Հայրենիք և Մայր Աթոռ Ս. Էջմիածին կատարված այցի առիթով: Նորին Սրբությունն իր գնահատանքը հայտնեց բոլոր նրանց, ովքեր մաս և բաժին ունեն աշակերտների կրթության և դաստիարակության գործում և նպաստում են նրանց ազգային, հայրենասիրական նկարագրի կերտմանը:
Անդրադառնալով հայեցի դաստիարակության և հայրենասիրության կարևորությանը` Նորին Սրբությունը վստահություն հայտնեց, որ աշակերտները, գտնվելով Հայաստանում, շատ լավ հնարավորություն ունեն մոտիկից հաղորդակից լինելու Հայրենիքի իրականությանը և ազգային-հոգևոր հարուստ ժառանգությանը:
«Հայրենիքը երաշխիքն ու ապահովությունն է հայ ժողովրդի հավերժ գոյության: Անհայրենիք անձը նման է մեկին, ով ծնողներ չունի, իսկ Հայրենիքի զավակը մշտապես պաշտպանված է, որովհետև Հայրենիքը պատրաստ է հովանավորելու, իր գիրկը բանալու սեփական զավակների առջև: Ազգային պատկանելության առումով Հայրենիքն ազգի զավակի կենսագրությունն է», – ընդգծեց Ամենայն Հայոց Կաթողիկոսը` պատգամելով միշտ արժևորել Հայրենիքը և կապված մնալ նրան:
Կարդացեք նաև
Իր հայրապետական պատգամը և օրհնությունը փոխանցելով աշակերտներին` Նորին Սրբությունը հորդորեց, որ ամեն ջանք ի գործ դնեն` օրինակելի ու հաջողված հայորդիներ լինելու և բարի օրինակ ծառայելու գալիք սերունդների համար: Այս առիթով Վեհափառ Հայրապետը նաև պատանիներին պատգամեց արդյունավետորեն օգտագործել իրենց ուսումնառության տարիները, որպեսզի ապագայում, իրենց առջև ունենալով տիար Սարգիս Պետոյանի բարի օրինակը, կարողանան օգտակար ծառայություն բերել հայոց ազգին, իրենց երկրին և Հայրենիքին:
Հանդիպմանն աշակերտներից երկուսն ասմունքեցին Ամենայն Հայոց Կաթողիկոսի առջև:
Վերջում Նորին Սրբությունը պատասխանեց աշակերտներին և ուսուցիչներին հետաքրքրող հարցերին, որոնք վերաբերվում էին Հռոմի Սրբազան Քահանայապետ Ֆրանցիսկոս Պապի` Հայաստան կատարված այցին, Հայ Եկեղեցու առաքելությանը և ներկայիս գործունեությանը:
Մայր Աթոռ Ս. Էջմիածին
Տեղեկատվական համակարգ
