Մալաթիա-Սեբաստիա վարչական շրջան կատարած աշխատանքային այցի շրջանակում Երևանի քաղաքապետ Տարոն Մարգարյանն այցելել է «Չինարի» այգի, ծանոթացել հանգստի գոտու վերակառուցման աշխատանքների ընթացքին, որն իրականացվում է քաղաքապետարան-մասնավոր հատված համագործակցության շրջանակում: Քաղաքապետին ներկայացնելով ծրագրի մանրամասները` պատասխանատուները նշել են, որ ցուցաբերվում է համալիր մոտեցում, ինչի շրջանակում բնակիչների լիարժեք հանգստի կազմակերպման համար ստեղծվում են անհրաժեշտ բոլոր պայմանները: Հանգստի գոտում արդեն իսկ տեղադրվել են նոր նստարաններ, աղբամաններ, ամբողջությամբ արդիականացվել է արտաքին լուսավորության ցանցը, վերակառուցվել է շատրվանային համալիրը, որն ապահովված է նաև ժամանակակից լուսային էֆեկտներով: Աշխատանքների վերջնարդյունքում 1998թ. ստեղծված «Չինարի» այգին, որն, ի դեպ,եղել է Հարավ-Արևմտյան թաղամասի առաջին հանգստի գոտին, ամբողջությամբ կվերագտնի իր երբեմնի հմայքն ու նպատակային նշանակությունը:
Կարևորելով մասնավոր հատվածի հետ համագործակցությունն ու համատեղ ծրագրերի իրականացումը՝ քաղաքապետ Տարոն Մարգարյանը մեկ անգամ ևս ընդգծել է, որ քաղաքապետարանը բաց և պատրաստակամ է համագործակցության համար և ողջունում է մասնավոր հատվածի մասնակցությունը Երևանի զարգացման ծրագրերին:
«Վերջին տարիներին Երևանի քաղաքապետարանի և մասնավոր հատվածի միջև ձևավորվել է իսկապես հաջողված համագործակցություն, որի լավագույն օրինակներից մեկն էլ Մալաթիա-Սեբաստիա վարչական շրջանի «Չինարի» այգու վերակառուցումն է: Այգին գտնվում էր անմխիթար վիճակում և մասնավորի մասնակցությունն ու ներդրումն իսկապես կարևոր էր ու սպասված: Վստահ եմ, որ հանգստի այս գոտին դառնալու է օրինակելի: Երևանի քաղաքապետարանի ծրագրերով այգիների վերակառուցման ուղղությամբ ևս մենք ծավալուն աշխատանքներ ենք իրականացնում և երբ այդ գործին միանում է նաև մասնավորը, իսկապես ողջունելի է: Բազմիցս նշել եմ, որ մենք բաց և պատրաստակամ ենք համագործակցության համար և մասնավոր բոլոր այն ընկերությունները, որոնք ցանկություն կհայտնեն իրենց մասնակցությունն ունենալ Երևանի բարեկարգման ծրագրերին, մենք կլինենք նրանց կողքին և մեր լիազորությունների շրջանակում կաջակցենք», – ընդգծել է քաղաքապետը:
Երևանի քաղաքապետարան
