«Դա մեր լավագույն համաձայնագրերից մեկն է»,-ՀՀ-ի եւ ՌԴ-ի միջեւ միավորված ՀՕՊ համակարգի մասին համաձայնագիրն այսպես է բնորոշում ԱԺ ՀՀԿ խմբակցության պատգամավոր Շիրակ Թորոսյանը:
«Մեդիա Կենտրոն»-ում այսօր հրավիրված ասուլիսի ժամանակ քաղաքագետ Արա Պապյանն այս առնչությամբ պատգամավորին հարցրեց` «Ղարաբաղը հիմա ենթակա՞ է պաշտպանության, թե` ոչ: Եթե Ադրբեջանի ավիացիան ռմբակոծի Ստեփանակերտը, պատերազմի հանցագործ Շամանովը, որը բռնագաղթի ենթարկեց Շահումյանի հայությանը, հարյուրավոր մարդիկ էլ անհետ կորան, նա՞ պետք է Ղարաբաղը պաշտպանելու հրաման տա»:
Թորոսյանը պատասխանեց. «Ղարաբաղի հետ կապված խնդրում մենք դժգոհություններ ունենք եւ դրանք բարձրաձայնել ենք ամենաբարձր մակարդակներում: ՀՕՊ-ը կարեւոր է հիմնականում մեր արեւմտյան սահմանների համար: Ինչո՞ւ շահարկել մի բան, երբ դրա կարիքը չկա»:
-Ադրբեջանն ունի 100 ուղղաթիռ…,-շարունակեց Պապյանը:
Կարդացեք նաև
-Թող 1000 ուղղաթիռ ունենա, դա մեր` Հայաստանի ՀՕՊ-ի խնդիրն է:
-Ո՞վ է ՀՀ ՀՕՊ ղեկավարը լինելու` Շամանովից բացի: Անունն ասեք:
-ՀՀ ՀՕՊ-ն անկախ ՀՀ-ի ՀՕՊ ղեկավարությունն է:
-Չկա՜ տենց բան, առանց Շամանովի հրահանգի ոչ մի բան չի լինի,-վրդովվեց Արա Պապյանը:
-Հայ-ռուսական ՀՕՊ համակարգը կապ չունի առանձին ՀՀ ՀՕՊ համակարգի հետ: ՀՀ-ն ունի իր ՀՕՊ համակարգը, որը պայքարելու է Ադրբեջանի դեմ,-հակադարձեց Շիրակ Թորոսյանը, ապա հավելեց,-«ՀՕՊ-ը կարեւոր է ՀՀ-ի համար, քանի որ ուղղված է Թուրքիայի դեմ: Չկապել այն Ադրբեջանի հետ…»:
«Կապրենք` կտեսնենք»,-ակնարկեց Արա Պապյանը:
Քաղաքագետը մեկ այլ խնդիր բարձրաձայնեց` ասելով, որ ՀՀԿ-ի նախընտրական ծրագրում ներառված է Ադրբեջանին տարածքներ հանձնելու մտադրությունը, մինչդեռ ՀՀԿ ղեկավար Սերժ Սարգսյանը բանակցում է հենց դրա շուրջը:
Շիրակ Թորոսյանն այսպես հակադարձեց. «Պաշտոնական տեղեկատվության համաձայն` Վիեննայում եւ Պետերբուրգում բանակցություններ բառի բուն իմաստով տեղի չեն ունեցել: Փորձ է արվել կողմերին բերել ընդհանուր հայտարարի»:
-Կազանյան փաստաթղթի շուրջ,-միջամտեց Արա Պապյանը:
-Չկա նման բան…
-Կա, Կազանյան փաստաթուղթը հրապարակվեց, Սերժ Սարգսյանն էլ ասաց, որ տվել է համաձայնություն:
-Դա Կազանում էր: Վիեննայում եւ Պետերբուրգում որեւէ փաստաթղթի շուրջ քննարկում չի եղել:
-Կուզեի Ձեզ հավատալ, բայց այդպես չէ:
Թորոսյանը շարունակեց պնդել, որ տարածքները հանձնելու մասին «Լավրովյան ծրագիր» ասվածը սին է:
Լուիզա ՍՈՒՔԻԱՍՅԱՆ
Լուսանկարը` «Մեդիա Կենտրոն»-ի
