«Տաքսին մարդ է իջեցրել, աջ գոտին զբաղված է, կանգնել է երկրորդ գոտում, ուղեւորի իջնելը տեւել է 7 վայրկյան: Այդ պահին մեկ այլ մեքենա, հատելով հոծ գիծը, անցել է տաքսու կողքով, երբ հանդիպակաց երթեւեկելի մասում ոչ մի այլ մեքենա չի եղել: Այսինքն, այդ մեքենան չի ստեղծել վտանգ»,-այս օրինակով «Աքիլես» ավտովարորդների իրավունքների պաշտպանության կենտրոն հ/կ-ի նախագահ Էդուարդ Հովհաննիսյան այսօր «Արմենպրես»-ում փորձեց լրագրողներին բացատրել, թե ո՞րն է վթարային իրավիճակ համարվում, իսկ որը` ոչ:
Նա նկատեց, որ հոծ գիծը հատած վարորդը վթարային իրավիճակ եւ վտանգ չի ստեղծել, ապա հարցրեց Ճանապարհային ոստիկանության իրավաբանական բաժնի պետ, Ոստիկանության գնդապետ Արման Չիլինգարյանին` «վթարային իրավիճակը եւ վթարի իրական վտանգը ո՞րն է, ՃՈ-ն չի կարողանում պատասխանել»: Հովհաննիսյանը շարունակեց հարցադրումը, թե ինչո՞ւ չի կարելի այս դեպքը համարել նվազ նշանակության խախտում եւ չտուգանել, ինչպես օրենքն է ասում:
Արման Չիլինգարյանն այսպես բացատրեց. «Պատկերացրեք, որ այդ տաքսու դիմացից հետիոտնը անցնում էր փողոցը, եւ տաքսուն շրջանցած եւ հանդիպակաց դուրս եկած մեքենան հետիոտնին գցում էր տակը: Նրա արարքը վտանգ է պարունակում»:
-Դուք դա ենթադրում եք,-հակադարձեց Հովհաննիսյանը:
Կարդացեք նաև
-Իսկ Դո՞ւք ինչ եք անում,-հարցրեց Չիլինգարյանը,-եթե դիմացը հատկապես անչափահաս հետիոտն լիներ, ի՞նչ էր լինելու:
-Հասկացանք, բա ինչի՞ եք սենց գրել օրենքում, հենա մի գրեք:
-Չենք պատրաստվում որեւէ մեկին տուգանքից ազատել միայն նրա համար, որ իր ցանկությամբ ինչ-որ արարք է կատարել եւ վտանգ է ստեղծել ինչ-որ մեկի համար: ՃՈ-ն չունի անձին պատասխանատվությունից ազատելու գործառույթ, երբ ինչ-որ մեկի կյանքի վտանգ կա: Չի կարելի նման բան անել…
Արման Չիլինգարյանը հավելեց, որ բոլոր հնարավոր միջոցներով ՃՈ-ն վարորդներին տեղեկացրել է 2015թ, դեկտեմբերին Վարչական իրավախախտումների վերաբերյալ ՀՀ օրենսգրքում փոփոխությունների մասին, որոնց արդյունքում նվազ նշանակության խախտումների դեպքում իրավախախտ վարորդն ազատվում է պատասխանատվությունից:
Լուիզա ՍՈՒՔԻԱՍՅԱՆ
