Սահմանադրության ոչ բոլոր դրույթներն են հունվարի 1-ից ուժի մեջ մտել:
«Մեդիա կենտրոնում» հրավիրված քննարկմանը Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) իրավախորհրդատու Հերիքնազ Տիգրանյանն այս առիթով նկատեց. «Չենք կարող ասել, որ ամբողջությամբ նոր սահմանադրությամբ ենք ապրում: Հիմա մեզ մոտ նորմերի կոլիզիա կա հին ու նոր սահմանադրությունների կիրառության միջև»:
Տիկին Տիգրանյանը փաստեց, որ նոր սահմանադրությամբ ՀՀ ԱԺ տարբեր հանձնաժողովների գործառույթների հատման հետ կապված, տարբեր ինստիտուտների` դեպի նոր սահմանադրության անցման հետ կապված խոչընդոտներ կան:
Կարդացեք նաև
ՀՀ ԱԺ ՀՀԿ խմբակցության անդամ, ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահի տեղակալ Մարգարիտ Եսայանը, շնորհավորելով հուլիսի 5-ին նշվող Սահմանադրության օրվա կապակցությամբ, նշված մտահոգությունների հետ կապված պարզաբանեց. «Սահմանադրությունը փոխվեց որոշ ամբողջական մասերով, բայց սա նոր սահմանադրություն չէ. սա հին սահմանադրության փոփոխված տարբերակն է»:
Տիկին Եսայանը մտահոգություն հայտնեց, որ ներկայումս գրախանութներում դժվար է գտնել սահմանադրությունը` փոփոխված տարբերակներով, և լավ կլինի` ՀՀ քաղաքացին փնտրի փոփոխություններով սահմանադրությունը և այն գտնի բոլոր կրպակներում:
Մարգարիտ Եսայանը մտահոգություն հայտնեց նաև, թե գրանցված 80 կուսակցություններից ներկայումս առյուծի բաժինն անգործության են մատնված: Սակայն ըստ Մարգարիտ Եսայանի` դա չի խանգարում, որ ՀՀ-ում շարունակվեն ստեղծվել նոր կուսակցություններ. «Դա նշանակում է, որ ՀՀ քաղաքական դաշտում տեղի է ունենում գաղափարախոսությունների, հայացքների, ասելիքի մաքրում, տեղավորում: Մենք ի վերջո պիտի հասնենք նրան, որ ՀՀ-ում լինեն կուսակցություններ համախմբված և կոնկրետ գաղափարախոսություն ունեցող: Որևէ մեկի մտքով այլևս չի անցնի, նույնիսկ, եթե շատ փող ու հնարավորություն ունի, հանկարծ սեփական հաճույքի և ցանկությունների համար կուսակցություն ստեղծել: Սա մաղվելու գործընթացն է»:
ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանը փաստեց, թե մեր հասարակությունը երբեք չի զգացել, որ Սահմանադրությունն իրենն է: Դառնալով ընտրական օրենսգրքին` Էլինար Վարդանյանն ասաց. «Իմ գնահատմամբ` այն հնարավորություն չի տալիս, որ բոլոր կուսակցություններն ունենան հավասար հնարավորություն քաղաքական դաշտում իրենց գործունեությունը ծավալելու համար»:
ՀՀ ԱԺ պատգամավոր Էդմոն Մարուքյանը նկատում է, որ այսօր եղած նոր քաղաքական ուժերն ավելի շատ հնարավորություններ ունեն մրցակցել գործող իշխանության հետ, քան եղած 20-25 տարվա կուսակցությունները. «Կարծում եմ` ուղղակի ընտրական օրենսգրքով այնպիսի անհավասար պայմաններ են ձևավորվել, որ իշխող կուսակցությունը մյուս կուսակցություններից մի քանի քայլ առաջ լինի»:
Էդմոն Մարուքյանի կարծիքով` անցումային փուլի դժվարությունները ի հայտ են գալու 2017-ի աշնանը, երբ նախագահի լիազորություններն ավարտվեն, և խորհրդարանն ամբողջությամբ ստանձնի պառլամենտական խորհրդարան լինելու հանգամանքը. «Հնարավոր է, որ այս փուլում ցնցումներ ունենանք, և շատ կարևոր է, որ բալանսավորված խորհրդարան ունենանք»:
Էդմոն Մարուքյանը, դառնալով Մարգարիտ Եսայանին, ասաց, թե՝ «Ձեր փոխարեն այդքան ջանասիրությամբ այս համակարգը չէի պաշտպանի», այնուհետև նշեց. «Կուզենամ, որ 6-րդ գումարման ԱԺ-ում Դուք, Ձեր տեսակի մարդիկ լինեն, բայց եթե Ձեզ հետ հանկարծ ՀՀԿ թաղապետ, օլիգարխ առաջադրվի, իմացեք, որ լուրջ խնդիր կունենաք»:
Մարգարիտ Եսայանն արձագանքեց. «Ես ոչ թե ջանասիրաբար այս կամ այն ուժին եմ պաշտպանում, այլ երբ հնչեցվում է կարծիք, որի դեմ ասելու բան ունեմ և դա իմ համոզմունքն է, ես պարտավոր եմ դա ասել անկախ կուսակցական պատկանելությունից: Եթե ասեք, որ որևէ երկրում ընդդիմությունն ավելի շատ լծակներ ունի, քան իշխանությունը, ես կզարմանամ: Երբ դուք գաք իշխանության, դուք նույնքան լծակներ եք ունենալու, որքան ունի այս իշխանությունը»:
Տաթև ՀԱՐՈՒԹՅՈՒՆՅԱՆ
