«ՌԴ-ի ահագնացող մեկուսացումը Արեւմուտքից. Այս պատճառով երկու մեկուսացող պետությունները` Թուրքիան եւ ՌԴ-ն, ձգտում են իրար»,-Ռուսաստանի եւ Թուրքիայի միջեւ հարաբերությունների կարգավորումն այսպես է բնորոշում «Մոդուս Վիվենդի» կենտրոնի ղեկավար, քաղաքագետ Արա Պապյանը:
«Անդրադարձ» մամուլի ակումբում հուլիսի 4-ին նա կարծիք հայտնեց, որ Թուրքիայի մերձեցումը ՌԴ-ի հետ Հայաստանի համար վտանգավոր է. «Գիտենք ՌԴ-ի քաղաքականությունը` սիրաշահել, իսկ դրա համար ինչ-որ բան պետք է տաս կամ զիջես: Այն, որ Պուտինն ուզում է Թուրքիայի հետ հարաբերությունները լավացնել, ակնհայտ է»:
Քաղաքագետի բնորոշմամբ` նշյալ մերձեցումը վտանգավոր է hատկապես «Լավրովյան ծրագրի» մասով, որն ածանցվում է Կազանի փաստաթղթից. «1994թ.-ից առկա փիլիսոփայությունն է` «տարածքների զիջում` կարգավիճակի դիմաց», որն այսօր նենգափոխվել է` դառնալով` «տարածքներ ոչ թե կարգավիճակի կամ խաղաղության, այլ ավելի կայուն կարգավիճակի դիմաց»: Եթե տանք, տալու ենք անվտանգության համար խիստ կարեւոր տարածքներ: Բազմաթիվ նշաններ կան, որ մեր իշխանություններն ուզում են գնալ այդ տարբերակին: Կկարողանա՞ն իրականացնել` կասկածում եմ, որովհետեւ հասարակության մեծ մասի համար դա ընդունելի չէ»:
Արա Պապյանը Մինսկի խմբի ձեւաչափի փոփոխության միտում է նկատում. «Եռանախագահողների ձեւաչափը փոխարինվում է ռուսական ձեւաչափով, իսկ թուրք-ռուսական մերձեցումը տեղի է ունեցել Ալիեւի եւ Նազարբաեւի միջնորդությամբ: Նրանք ազդեցություն ունեն Պուտինի վրա, նման մարդկանց խմբում մենք ինչպե՞ս ենք լսելի դարձնելու մեր ասելիքը: Հայկական կողմը սկզբունքորեն պետք է դեմ լինի տարածքների զիջմանը»:
Կարդացեք նաև
Քաղաքագետի խոսքով` ՌԴ-Թուրքիա մերձեցման ֆոնին մեծանում է Ադրբեջանի եւ ԼՂՀ-ի միջեւ պատերազմի հավանականությունը. «Կարծում եմ` մեկ-երկու ամսով հետաձգվել է պատերազմը: Ադրբեջանաթուրքական տեսակետն է` ինչո՞ւ մի բան անել պատերազմով, եթե կարելի է անել խաղաղ ճանապարհով` ռուսական ճնշմամբ»:
Լուիզա ՍՈՒՔԻԱՍՅԱՆ
