Եվրամիության` արտաքին քաղաքականության և անվտանգության քաղաքականության հարցերով գլոբալ ռազմավարությամբ խստացվելու է անվտանգության ապահովման բաղադրիչը:
«Մեդիա կենտրոնում» հրավիրված ասուլիսին Հայաստանում Եվրամիության պատվիրակության ղեկավար, դեսպան Պյոտր Սվիտալսկին շեշտեց, որ սա հնարավորությունների փաստաթուղթ է: Դառնալով ռազմավարության առաջնահերթություններին` դեսպանը կարևորեց անվտանգության բաղադրիչը. «Եվրամիությունները, հաշվի առնելով ներկայիս մարտահրավերները, ցանկանում է բարձրացնել իր` անվտանգության համակարգի վարկանիշը: Իհարկե, ԵՄ-ն հավաքական անվտանգության համակարգ չէ, սակայն այս ռազմավարությամբ զգալիորեն բարձրացվել է անվտանգության ապահովման բաղադրիչի դերակատարությունը: Անդամ պետություններում այս հարցում ԵՄ-ն ավելի մեծ ներդրում է ունենալու»:
Մյուս առաջնահերթությունը հակամարտությունների հարցում համապարփակ մոտեցման ձևավորումն է: Հարցին ի պատասխան` սա նշանակո՞ւմ է, որ ԵՄ-ն փոխելու է Ղարաբաղյան հակամարտության կարգավորման հարցում իր մոտեցումը, դեսպանը հիշեցրեց, թե Վիեննայի և Սանկտ Պետերբուրգի հանդիպումները հակամարտության կարգավորման նոր փուլ են ձևավորել: Դեսպանը շեշտեց. «Վիեննայում ձեռք բերված պայմանավորվածությունները պետք է իրականացվեն, որովհետև դրանք կառուցում են այս գործընթացում փոփոխության ճանապարհը»: Պարոն Սվիտալսկին շեշտեց նաև ԵԱՀԿ Մինսկի խմբի դերակատարությունը` նշելով, թե ԵՄ-ն Մինսկի խմբի «մեջքին կանգնած» է:
Դեսպանը տեղեկացրեց, որ վաղը Հայաստան է այցելելու Հարավային Կովկասի և Վրաստանի ճգնաժամի հարցերով ԵՄ Հատուկ ներկայացուցիչը. «Սա վկայում է այն մասին, որ ԵՄ-ն ցանկանում է ավելի մեծ ներդրում ունենալ հակամարտության կարգավորման հարցում»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
