Վրաստանի մայրաքաղաք Թբիլիսիում ընթացող ԵԱՀԿ Խորհրդարանական վեհաժողովի նիստերի ընթացքում, Շվեյցարիայի նախաձեռնությամբ, հանդիպել են Հայաստանի Հանրապետության, Ադրբեջանի և Վրաստանի պատվիրակությունները։ Այս մասին տեղեկացնում է АПА լրատվական գործակալությունը։
Հանդիպմանը ներկա են եղել ԵԱՀԿ Խորհրդարանական վեհաժողովում ադրբեջանական պատվիրակության ղեկավար, Ադրբեջանի խորհրդարանի փոխնախագահ Բահար Մուրադովը, ԵԱՀԿ Խորհրդարանական վեհաժողովում Հայաստանի Հանրապետության պատվիրակության ղեկավար Արտաշես Գեղամյանը, իսկ վրացական կողմից պատգամավորներ Ջիա Վոլսկին և Թեդո Ջափարիձեն։
Հանդիպման նախաձեռնությամբ հանդես եկած Շվեյցարիայի պատվիրակության ղեկավար Ֆիլիպ Լոմբարդը առաջարկներ է ներկայացրել Հայաստանի և Ադրբեջանի միջև բանակցությունների ակտիվացմանը նպաստելու համար։
Իր խոսքում Արտաշես Գեղամյանը նշել է. «Մեր երկրների նախագահների միջև լուրջ բանակցություններ են ընթանում, որոնց շուտով կմիանա նաև Ֆրանսիայի նախագահը։ Ես կցանկանայի, որ բանակցություններին մասնակցեին ԵԱՀԿ Մինսկի խմբի համանախագահներն ու Լեռնային Ղարաբաղի ներկայացուցիչները»։
Կարդացեք նաև
Ադրբեջանական պատվիրակության ղեկավար Մուրադովն իր հերթին նշել է, որ «Ղարաբաղը Ադրբեջանի անբաժանելի մասն է»։ Նա նաև ավելացրել է. «Աշխարհի որևէ պետություն չի ճանաչել ղարաբաղյան անջատողականների իշխանությունը, և նրանց ներկայացուցիչների մասնակցությունը բանակցություններին անհնար է»։
