Բոլորին քաջածանոթ այս սառնապուրով էր տատիկս տարիներ շարունակ ողջ ամառ, կիզիչ շոգին, օրվա մեջ առնվազն մեկ անգամ՝ կեսօրին, ընդհատում մեր բակային խաղերը կամ ընթերցանությունը: Եթե թույլ տային՝ երեկոյան եւ նախաճաշին էլ բրդոշով կսնվեինք, սակայն տատիկս պնդում էր, որ բրդոշը միայն ցերեկվա համար է: Եվ իսկապես, կեսօրվա կիզիչ շոգին այս սառնապուրն իսկական փրկություն է:
Անհրաժեշտ մթերքները
Մածուն- 1 լիտր
Ջուր – 1 լիտր
Կարդացեք նաև
Թարմ վարունգ- 2 հատ
Խառը թարմ կանաչի (սամիթ, համեմ, մաղադանոս, կարելի է նաեւ՝ մի քանի ճյուղ անանուխ կամ թարխուն) – կես կապ
Կանաչ սոխ- 2-3 ճյուղ (պարտադիր չէ)
Կծու թարմ կանաչ պղպեղ- 0,5 հատ (պարտադիր չէ)
Աղ- 1 թեյի գդալ
Աղացած սեւ պղպեղ- մի պտղունց
Չոր լավաշ
Պատրաստման եղանակը
Վարունգն ու կանաչին լավ լվանալ: Վարունգը, եթե մատղաշ է, եւ դառը չէ, թողնել կեղեւով, հակառակ դեպքում՝ կեղեւահանել: Մանր կտրատել վարունգը, կանաչիները, եթե ավելացնելու եք կանաչ սոխ եւ կանաչ պղպեղ՝ դրանք էլ լավ լվացեք եւ մանր կտրատեք:
Լցրեք տարայի մեջ, որը կարող է լինել ինչպես կաթսա, թաս, այնպես էլ՝ ջրաման: Վրան աղ ու սեւ պղպեղ արեք, ապա ավելացրեք մածունը, լավ խառնեք եւ քիչ-քիչ ավելացրեք ջուրը:
Ապուրամանների մեջ մանրեցրեք (բրդեք) չորացրած լավաշը՝ ըստ ճաշակի: Չոր լավաշի վրա լցրեք մածնաբրդոշը եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«Առավոտ»
02.07.2016
