Ռուսական Lenta.ru պարբերականի հատուկ թղթակիցը, որը ներկա է եղել 2016թ. հուլիսի 1-ին Սոչիում կայացած Սևծովյան տնտեսական համագործակցության անդամ պետությունների արտաքին գործերի նախարարների գագաթնաժողովին՝ հատուկ ուշադրություն է դարձրել ՌԴ ԱԳ նախարար Սերգեյ Լավրովի հանդիպմանը Թուրքիայի իր գործընկերոջ՝ Մևլութ Չավուշօղլուի հետ։
Թղթակիցը նշում է, որ 2015թ. նոյեմբերից հետո, երբ լարվեցին ռուս-թուրքական հարաբերությունները, Լավրովն ու Չավուշօղլուն հանդիպեցին առաջին անգամ։ Ռուսաստանի և Թուրքիայի արտաքին գերատեսչությունների ղեկավարների հանդիպումը տեղի ունեցել Սոչիի Русь առողջարանի սիգարի ծխասենյակներից մեկում՝ փակ դռների հետևում։
Հանդիպումից հետո առաջինը դուրս է եկել Թուրքիայի ԱԳ նախարար Մևլութ Չավուշօղլուն, որն, ըստ աղբյուրի, ակնհայտ գոհ է եղել տեղի ունեցած հանդիպման արդյունքներից։ Թղթակցի խոսքերով՝ դա կարելի էր տեսնել նույնիսկ Չավուշօղլուի դեմքի արտահայտչությունից։
Թուրքիայի ԱԳ նախարարը բարեհաճորեն պատասխանել է լրագրողների բոլոր հարցերին: Լավրովի մասին արտահայտվելիս օգտագործել է «իմ թանկագին ընկեր Սերգեյը» արտահայտությունը, նշել, որ բանակցություններն անցել են ջերմ մթնոլորտում և, որ Թուրքիայի նախագահ Ռեջեփ Թայիփ Էրդողանը պատրաստ է մինչև G-20-ի գագաթնաժողովը ՌԴ-ում հանդիպել ռուսաստանցի իր պաշտոնակից Վլադիմիր Պուտինի հետ։
Կարդացեք նաև
Վերը նշված աղբյուրի հետ հարցազրույցի ընթացքում Չավուշօղլուն ավելացրել է նաև, որ Թուրքիան մշտապես ցանկացել է բարիդրացիական հարաբերություններ ունենալ իր հարևանների հետ. «Զարմանալիորեն համընկավ, որ մենք միաժամանակ կարգավորում ենք մեր հարաբերությունները Ռուսաստանի և Իսրայելի հետ»։
Ռուսական պարբերականի թղթակիցը նշում է, որ Չավուշօղլուից հետո բանակցությունների սենյակից դուրս է եկել ՌԴ ԱԳ նախարար Լավրովը, որն, ի տարբերություն Չավուշօղլուի, բավական զուսպ տեսք է ունեցել, իսկ Չավուշօղլուի մասին արտահայտվելիս օգտագործել է «թուրք գործընկեր» արտահայտությունը։
Լավրովն ասել է, որ թուրքական իշխանությունները խոստացել են ապահովել Թուրքիայում իրենց հանգիստն անցկացնել ցանկացող Ռուսաստանի Դաշնության և այլ պետությունների քաղաքացիների անվտանգությունը։
Թուրքիայի հարաբերություններ կարգավորելու քաղաքականության մասին խոսել է թուրք վերլուծաբան Սերքան Դեմիրթաշը՝ ասելով, որ առաջիկայում այդ երկիրը կարող է հաշտության նոր գործընթացներ սկսել մյուս հարևանների, առաջին հերթին, Եգիպտոսի և Իրաքի հետ։ Բացառված չէ նաև, որ Թուրքիան քայլեր ձեռնարկի Հայաստանի հետ հարաբերությունները կարգավորելու համար։
