Լարիսա Ալավերդյանը, Հրանուշ Խառատյանն ու Կարինե Դանիելյանը մի փաստաթուղթ են պատրաստել, որով մերժում են մադրիդյան սկզբունքների կամ նրա շուրջ որևէ փաստաթղթի հիման վրա բանակցությունների շարունակությունը:
«Հայելի» ակումբում լրագրողների հետ հանդիպմանը «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը տեղեկացրեց, որ այդ փաստաթղթով դիմելու են ՀՀ իշխանություններին, միջազգային հանրությանը` հանձին ԵԱՀԿ Մինսկի խմբին և ժողովրդին:
Տիկին Ալավերդյանի համոզմամբ` մադրիդյան սկզբունքները ուղղակի փակուղի են. «Այսպես կոչված Կազանի գործընթացը համարում ենք ոչ միայն անպտուղ, այլ վտանգավոր և հակասող տարածաշրջանում ապրող բոլոր ժողովուրդների անվտանգության ու գոյության համար: Կոչ ենք անում հրաժարվել այս անորոշ և երկիմաստ թեզերից, որոնք խեղաթյուրում են Արցախի հիմնահարցը և ազգային ազատագրական պայքարը ներկայացնում որպես 1992-ի` ԼՂԻՄ-ի սահմանում ինքնորոշման իրավունքի վրա եղած հարց»:
Լարիսա Ալավերդյանի համոզմամբ` «Կազանի փաստաթուղթը հատուկ ձևով շրջանառության մեջ է դրվել ժողովրդին համաձայնեցնելու այդ մտքին և համոզելու, որ սա է ճանապարհը»:
Կարդացեք նաև
Նա պատահական չի համարում Գերմանիայի արտաքին գործների նախարար, ԵԱՀԿ գործող նախագահ Ֆրանկ-Վալտեր Շտայնմայերի հայտարարությունը, որ ստատուս քվոն չի կարող այսպես շարունակվել, քանի որ այն պարունակում է էսկալացիայի նոր հնարավորություն: Լարիսա Ալավերդյանն այս առիթով նշեց. «Սա ոչ այլ ինչ է, քան կոչ, որ նա կարող է սկսել էսկալացիան»:
Տիկին Ալավերդյանը մտահոգություն հայտնեց, որ ՀՀ երեք նախագահները խճճել են Արցախի հարցը. «Այն օրը, երբ Արցախը դուրս մղվեց բանակցային սեղանից, Հայաստանը չպետք է նստեր որևէ սեղանի շուրջ: ՀՀ իշխանությունները պետք է խոստովանեն` կամ իրենք կարողանում են դիմադրել ստեղծված իրավիճակում կամ չեն կարողանում դիմադրել, ու պետք է առաջարկեն, որ դա անեն ուրիշները, կամ իրենք հայտարարեն, որ այս գործընթացն այս հասկացության վրա հնարավոր չէ, քանի որ դա ոչ միայն հայերի համար է վտանգավոր, այլ տարածաշրջանի ժողովուրդների գոյությունն է խոցելի դարձնում. Ադրբեջանի ճնշման տակ գտնվող ժողովուրդները հույսով նայում են, թե Արցախն ինչպես է պայքարում»:
Տաթև ՀԱՐՈՒԹՅՈՒՆՅԱՆ
Արցախի հարցը լուծելու միակ ձեվը նրա հստակեցումն է. իսկ հստակեցման համար չպետքէ սպասել ադրբեջանին այլ պետք է առաջ գնալ . առաջ գնալու համար մի քիչ կամք ու մի քիչ համարձակություն է պետք.Արցախի անկախությունը ճանաչեք եվ շատ հարցեր կը պարզվի եվ հայաստանի դիրքերը կամրապնդվի նկատի ունենանք որ ժամանակը մեր օգտին չէ.