«Ռուսաստանի եւ Թուրքիայի հարաբերությունները վաղ թե ուշ պետք է որոշակիորեն կարգավորվեին, որովհետեւ Թուրքիայի վերջին շրջանի քաղաքականությունը ՌԴ-ի հետ հարցերում պայմանավորված էր աշխարհաքաղաքական արդի իրողություններով: Դրանք ստիպեցին, որ Թուրքիան ու Ռուսաստանը սկիզբ դնեն հարաբերությունների կարգավորմանը»,-կարծում է թուրքագետ Լեւոն Հովսեփյանը:
Հուլիսի 1-ին «Արմենպրես»-ում լրագրողների հետ հանդիպման ժամանակ նա մասնավորեցրեց, որ Սիրիայի հարցում Թուրքիայի քաղաքականությունը ձախողվել է եւ լուրջ ռիսկեր ի հայտ բերել. «Այս համատեքստում ՌԴ-ի հետ հարաբերությունների նման վատթարացումը կարծես ռիսկերն ավելի առարկայական էր դարձնում: Բացի այդ, Թուրքիայի արտաքին քաղաքականության համար ՌԴ-ն միշտ կարեւոր գործոն է»:
Լեւոն Հովսեփյանի դիտարկմամբ` ԱՄՆ-Թուրքիա հարաբերություններն այսօր բարդ փուլում են, իսկ Թուրքիայի համար չափազանց կարեւոր է կարգավորել հարաբերությունները ՌԴ-ի հետ. «Այդ գործընթացը բավականին դանդաղ կընթանա: Լուրջ հակասություններ կան, չնայած կողմերը կգնան կարգավորման` առաջնահերթ ընտրելով տնտեսության ոլորտը»:
Անդրադառնալով Էրդողանի` Պուտինին ուղղված «մեղայական նամակին»` Լեւոն Հովսեփյանն ասաց. «Ինձ համար նամակի բովանդակությունը տարօրինակ է: Միջպետական հարաբերությունների մակարդակում Թուրքիան քաղաքական ներողություն չի հայցել: Այստեղ որոշակի լղոզվածություն կա: Թուրքիան չի պատրաստվում փոխհատուցել այնպես, ինչպես պահանջում է ՌԴ-ն, մասնավորապես` ասում է` փոխհատուցում կլինի, եթե դիմի սպանված ռուս օդաչուի ընտանիքը: Բացի այդ, Անկարան այդքան էլ հակված չէ ռուս օդաչուին սպանած ահաբեկիչներին պատժելու հարցում»:
Կարդացեք նաև
Լուիզա ՍՈՒՔԻԱՍՅԱՆ
