«Գելափ Ինթերնեյշնլ» Հայաստանի ներկայացուցչության տնօրեն Արամ Նավասարդյանը հուլիսի 1-ին «Զարկերակ» մամուլի ակումբում ներկայացրեց հետազոտության արդյունքները:
Հետազոտության ընթացքում կատարվել են դեմ առ դեմ 1106 հարցումներ: Այն իրականացվել է մայիսի 13-24-ը Հայաստանի Հանրապետության տարբեր մարզերում: Հարցվածների 26 տոկոսը հավանություն է տալիս նախագահի գործունեությանը, 68.3 տոկոսը հավանություն չի տալիս, իսկ 5.7 տոկոսը դժվարանում է պատասխանել: Կառավարության գործունեությանը հավանություն է տալիս հարցվածների 17.6 տոկոսը, հավանություն չի տալիս 77.4 տոկոսը, իսկ 5 տոկոսը դժվարանում է պատասխանել: Ազգային ժողովի գործունեությանը հավանություն է տալիս 15.2 տոկոսը, հավանություն չի տալիս 79.6 տոկոսը, 5.2 տոկոսը դժվարանում է պատասխանել:
Քաղաքացիների 84.1 տոկոսի համար սոցիալ-քաղաքական իրադարձությունների մասին տեղեկատվության աղբյուր է հանդիսանում հեռուստատեսությունը, 37.6 տոկոսի համար՝ շրջապատը, 36.8 տոկոսի համար՝ «Ֆեյսբուքը», 13.4 տոկոսի համար՝ լրատվական կայքերը:
Կազմակերպությունը հետաքրքրվել էր նաեւ, թե արդյոք քաղաքացիները մասնակցելո՞ւ են 2017 թվականի խորհրդարանական ընտրություններին, 43.5 տոկոսը միանշանակ մասնակցելու է, 28 տոկոսը ավելի շուտ մասնակցելու է, 8.1 տոկոսը ավելի շուտ չի մասնակցելու, 12.3 տոկոսը միանշանակ չի մասնակցելու, իսկ 8 տոկոսը դժվարացել է պատասխանել: Այսպիսով՝ ըստ հարցման, 71.5 տոկոսը մասնակցելու է ընտրություններին:
Կարդացեք նաև
Հետաքրքրվել են նաեւ, եթե ընտրությունները լինեն մոտակա կիրակի օրը, ապա ո՞ր քաղաքական կուսակցությանը կտային իր ձայնը, 32.5 տոկոսը հրաժարվել կամ դժվարացել է պատասխանել, 41 տոկոսը պատասխանել է ոչ մեկին: Քաղաքացիների 9 տոկոսը իր ձայնը կտար Հայաստանի Հանրապետական կուսակցությանը, 8.3 տոկոսը Բարգավաճ Հայաստան կուսակցությանը, իսկ 3.2 տոկոսը Հայ հեղափոխական դաշնակցությանը:
Ամի ՉԻՉԱԿՅԱՆ
