15 տարում Ինֆորմացիայի ազատության կենտրոնը տեղեկատվության ազատությանն առնչվող 60 ավելի դատական հայց է ներկայացրել, 75 տոկոսի դեպքում դատարանի վճիռը դրական է եղել` հօգուտ կենտրոնի: Այս մասին հուլիսի 1-ին «Արմենպրես» լրատվական գործակալության մամուլի սրահում ԻԱԿ-ի 15-ամյակն ամփոփող ասուլիսի ժամանակ ասաց կենտրոնի նախագահ Լիանա Դոյդոյանը:
Նա տեղեկացրեց, որ հայցադիմումների պահանջն էր` պետական մարմիններից ստանալ տեղեկատվություն. «Մերժված հայցերը հիմնականում վերաբերում էին անհատական տվյալներին կամ առեւտրային գաղտնիքներին»:
Բանախոսը հայտնեց, որ ԻԱԿ-ի 2016թ. առաջին եռամսյակի «սեւ ցուցակում» են ԴԱՀԿ-ն, աշխատանքի եւ սոցիալական հարցերի նախարարությունը, Կենտրոնական ընտրական հանձնաժողովը, որոնք չեն պատասխանել կենտրոնի հարցումներին: Այս առումով առավել բաց եւ թափանցիկ են աշխատում Կրթության եւ գիտության, Առողջապահության նախարարությունները: Իսկ ԻԱԿ-ի 2015թ. տեղեկատվության ազատության ինդեքսով` բարձր ցուցանիշ են գրանցել Կոտայքի եւ Արմավիրի մարզպետարանները: Վերջիններիս զիջում են ՊՆ-ն, Ազգային անվտանգության ծառայությունը եւ Ազգային Ժողովը:
Լիանա Դոյդոյանը նաեւ հայտնեց, որ 2013թ.-ից «Տեղեկատվության ազատության մասին» օրենքը չի փոփոխվել: «Այսօր էլեկտրոնային հարցումների խնդիրն է կարեւոր, ինչի առնչությամբ աշխատում ենք օրենսդրական փոփոխությունների փաթեթ ներկայացնել Կառավարությանը: 2016թ. հունվարից Կառավարության որոշմամբ սահմանվեց, որ տեղեկություն ստանալու էլեկտրոնային հարցումները հավասարվում են գրավոր հարցումներին: Հունվարից հիմնականում էլեկտրոնային հարցումներ ենք ուղարկում, սակայն պետական մարմիններում դեռեւս ամրապնդված չէ էլեկտրոնային փոստերը ստուգելու մշակույթը: Հիմնականում հին կարգով են աշխատում` էլեկտրոնային հարցումները տպում են, դրանք անցնում են «բյուրոկրատական շրջան»…Մինչդեռ հատկապես լրագրողների էլեկտրոնային հարցումների դեպքում արագ պատասխանելու խնդիր կա»,-նկատեց Լիանա Դոյդոյանը:
Կարդացեք նաև
Լուիզա ՍՈՒՔԻԱՍՅԱՆ
