Լրատվական Trend գործակալության ռուսական ծառայության ղեկավար Էլմիրա Թարիվերդիևան անդրադարձել է Լեռնային Ղարաբաղի հակամարտության բանակցային գործընթացի ներկա զարգացումներին և Ռուսաստանի Դաշնության արտաքին գործերի նախարար Սերգեյ Լավրովի՝ Բաքու կատարելիք առաջիկա այցին։
Հոդվածագիրն ուշադրություն է դարձրել Ադրբեջանի ԱԳ նախարարի այն խոսքերին, որոնց համաձայն՝ Լավրովի՝ Բաքու այցելությունից է կախված՝ տեղի կունենա՞ արդյոք ՀՀ և Ադրբեջանի նախագահների հաջորդ հանդիպումը։ Այս հայտարարությունից Թարիվերդիևան հետևություն է արել, որ Լավրովն այժմ կանգնած է խնդրի առջև՝ Բաքու բերել այնպիսի առաջարկ, որը կհամոզի ադրբեջանական կողմին բանակցությունների շարունակման անհրաժեշտության և կարևորության մեջ. «Ադրբեջանը վերջերս մեկ անգամ չի հայտարարել, որ բանակցել պարզապես բանակցելու համար տարբերակը չի հետաքրքրում Բաքվին։ Նման է, որ սա հստակ հասկացել են հակամարտության բոլոր կողմերը, և այսօր բանակցային գործընթացի ճակատագիրը կախված է հանգամանքից, թե ինչ առաջարկ կբերի Լավրովն իր հետ»։
Թարիվերդիևայի կարծիքով՝ բանակցային գործընթացի ներկա զարգացումների վերլուծությունը ցույց է տալիս, որ այս փուլում կարող է լուրջ առաջընթաց գրանցվել, որը, կարծես, սարերի հետևում չէ։
