Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանի գործով դատական նիստում այսօր հարցաքննվեցին երկու ոստիկան՝ միջադեպի մասնակից:
Առաջին վկան՝ ոստիկան Գագիկ Թումասյանը պատմեց, որ 2015 թվականի դեկտեմբերի 31-ին առավոտյան 8:30 –ից ծառայություն էր իրականացնում Ազատության հրապարակում. այդ օրը «Նոր Հայաստանի» անդամները նստացույց էին իրականացնում, կեսգիշերին՝ 12:00-ին Սայաթ-Նովա փողոցից մոտենում էին ակտիվիստները՝ նրանցից մեկը տոնածառի հագուստով էր, ոստիկանները մոտեցան, որ կանխեն նրանց մուտքը հրապարակ, սկսվեց քաշքշոց: Այս վկան ոչինչ չէր հիշում միջադեպից՝ պատճառաբանելով, որ մութ է եղել, բացի ոստիկան Գեղամ Խաչատրյանին հարվածելու պահը. «Գեւորգ Սաֆարյանը ձախ ձեռքով հարվածեց Գեղամ Խաչատրյանի աջ հոնքին, Գեղամ Խաչատրյանը վայր ընկավ, Գեւորգ Սաֆարյանը դիմեց փախուստի դեպի ծառերի կողմ: Նրա հետեւից վազեցինք, հետո ավելի շատ ժողովուրդ մոտեցավ, սկսեցին հարվածել, քաշքշոց սկսվեց»:
Ոստիկանը մտաբերեց, որ այդ միջադեպից առաջ մի միջադեպի մասին էլ է լսել. «Կարո Եղնուկյանը փորձել է եղեւնի մտցնի հրապարակ, ականատես չեմ եղել, լսել եմ»:
Այս ոստիկանն էլ նախորդ նիստերին հարցաքննված ոստիկանների պես էր նկարագրում դեպքը, որ ոստիկանները հասարակական կարգը պահպանելու ուղղությամբ էին աշխատում, ակցիայի մասնակիցների նկատմամբ բռնություն չեն կիրառել, ինքնապաշտպանվել են, կիրառել ոտնակ հնարքներ:
Կարդացեք նաև
Գագիկ Թումասյանի խոսքով, իրեն էլ են հարվածել, եթե չի սխալվում ձմեռ պապիի գլխարկով քաղաքացին է եղել հարվածողը, ինքնապաշտպանվելու համար ինքն էլ է հարվածել, չի հիշում քանի քաղաքացու է հարվածել, բոլոր նրանց, որոնք իրեն էին հարվածում:
Նա նաեւ պատմեց, որ Գեղամ Խաչատրյանին տեղափոխել են թիվ մեկ համալսարանական հիվանդանոց՝ երկու ոստիկանի ուղեկցությամբ:
Պաշտպանն էլ հետաքրքրվեց՝ մինչեւ ծառայություն սկսելը ինչ հրահանգավորում են ստացել, օրինակ իրենց հրահանգե՞լ են որոշ առարկաներ արգելել մտցնել հրապարակ, օրինակ՝ տոնածառ: Վկան ասաց, որ իրեն նման բան չեն հրահանգել:
Այս վկան չմտաբերեց նաեւ դեպքի օրը քաղաքացիներից մեկի ուշաթափման մասին: Նա չկարողացավ պատասխանել հարցին, թե որտեղից իրեն տեղեկություն, որ ոստիկանները տոնածառի հագուստով քաղաքացուն օրինական պահանջ են ներկայացրել, բայց վստահեցրեց, որ մինչեւ քաշքշոցը հաստատ ներկայացրել են՝ չհիշելով, թե կոնկրետ որ ոստիկանն է ներկայացրել ու ինչ է պահանջել:
Արփինե ՍԻՄՈՆՅԱՆ
