«Այդ շարժումն ինձ մեծ ուրախություն է պատճառել: Մեր երկիրը փոխվում է, հանրությունը եւս` դեպի լավը: Այս երիտասարդությունը մշտապես շփման մեջ է Արեւմուտքի հետ եւ չունի բարդույթներ, որոնք ունի սովետական «շշալցման» սերունդը»,-2015թ. էլեկտրաէներգիայի թանկացման դեմ պայքարի ElectricYerevan շարժումն այսպես է բնորոշում գրող, հրապարակախոս Վահրամ Մարտիրոսյանը:
Նորաբաց «Հոդված 3» ակումբում հունիսի 29-ի քննարկման թեման էր «ElectricYerevan֊»-ը` որպես քաղաքական եւ հասարակական պայքարի գործընթաց: Վահրամ Մարտիրոսյանի բնորոշմամբ` այսօր շարժումը նույնպիսի շարունակություն չի ստացել, որովհետեւ «նպատակների նեղությունը» խանգարեց. «Պայքարի նյութական կողմը կարող է միայն կարճատեւ բողոքի ալիքի պատճառ դառնալ»:
Քաղաքացիական ակտիվիստ, «Ոչ թալանին» նախաձեռնության անդամ Մաքսիմ Սարգսյանը եւս նշեց, որ «ElectricYerevan֊»-ի խնդիրն իսկապես նյութական-սոցիալական էր, քանի որ հարցը վերաբերում էր էլեկտրաէներգիայի թանկացմանը. «Բայց մարդիկ հասկանում էին դա եւ գալիս էին մի պատճառով` «Բաղրամյանում» նստած անձը եւ կառավարությունն աշխատում են հօգուտ սեփական գրպանի: «Բաղրամյանից» առաջ շատ մեծ աշխատանք ենք կատարել, անգամ մինչեւ լույս թռուցիկներ ենք բաժանել: Այնպես չի, որ «Բաղրամյանը» միանգամից եղավ»:
Կարդացեք նաև
Քննարկմանը մասնակից իրավապաշտպան Վարդան Հարությունյանի ուշադրությունը գրավեց «ElectricYerevan֊»-ի` «Հոդված 3»-ում ցուցադրվող հայտնի լուսանկարներից մեկը, որում «ցուցարար»-երեխայի շապիկին գրված է` «Չեք ուտելու իմ բաժին կաթը»: «Իրականում ամենամիամիտն այդ փոքրիկն է, նրա բաժին կաթը կերել են եւ ուտելու են շատ ցինիկ ձեւով: Ոստիկանության գործելակերպը, որը տեսանք «ElectricYerevan֊»-ի ժամանակ, շարունակվում է նաեւ այսօր: Իշխանություններն առանց բռնությունների չեն պատկերացնում իրենց գոյությունը»,-նկատեց Վարդան Հարությունյանը:
«Իրազեկ քաղաքացիների միավորում» հ/կ ներկայացուցիչ Դանիել Իոաննիսյանի համոզմամբ` ժամանակն է, որ քաղաքացիական հասարակությունն օգնի կուսակցություններին` լուծել վերջիններիս խնդիրները. «Եթե այս խնդիրը լուծենք եւ բարձրացնենք կուսակցությունների ինստիտուտի հեղինակությունը, կկարողանանք մեծ հաջողություններ արձանագրել»:
«Կովկասի ինստիտուտի» տնօրեն, քաղաքագետ Ալեքսանդր Իսկանդարյանի դիտարկմամբ էլ` «ElectricYerevan֊»-ը քաղաքական ընդվզման տեսակ է, որը խմորվել է «Մաշտոցի պուրակից» եւ «Թեղուտի պայքարից». «Շատ ցուցադրական էր քաղաքական գործիչների այցը Բաղրամյան պողոտա, կարծես ասացին` «եկեք մենք ձեզ գլխավորենք», ցուցարարներն էլ ասացին` «գրողի ծոցը գնացեք»: Քանի դեռ չի ձեւավորվել լուրջ կուսակցական համակարգ, էլի կլինեն նման ցույցեր եւ բռնկումներ, որոնք «կհանգցնեն»:
Լուիզա ՍՈՒՔԻԱՍՅԱՆ
