«Հակաօդային պաշտպանության նոր համակարգի ձեւավորումը թույլ է տալիս, որ հատկապես Հարավային Կովկասի` Հայաստանի Հանրապետության տարածքում մեր օդային պաշտպանության խնդիրներում ներառենք նաեւ ՌԴ 102-րդ ռազմաբազայի, 4-րդ սերնդի բազմաֆունկցիոնալ կործանիչների, օդատիեզերական զորքերի հնարավորությունները, որոնք հնարավորություն կտան նաեւ հետախուզական լուրջ տվյալներ ունենալ, որոնք էլ կկանխարգելեն մեր հակառակորդների խախտումները»,-հունիսի 29-ին «Եռաբլուր» զինվորական պանթեոնում հայրենիքի համար նահատակվածների և անհայտ կորածների հիշատակի միջոցառման ժամանակ լրագրողների հետ զրույցում ասաց ՀՀ պաշտպանության նախարար Սեյրան Օհանյանը` անդրադառնալով ՀՀ-ի եւ ՌԴ-ի միջեւ միասնական ՀՕՊ համակարգ ստեղծելու համաձայնագրին, որը քննարկվում էր ԱԺ-ում:
Կարծիքը, թե այդ կերպ Հայաստանը թիրախ է դառնում ՆԱՏՕ-ի համար, նախարարն այսպես մեկնաբանեց. «Մենք հավասարաչափ ՀԱՊԿ-ի եւ ՆԱՏՕ-ի շրջանակներում բազմակողմ հարթության վրա համագործակցություն ենք իրականացնում»:
Ինչ վերաբերում է մտավախությանը, թե պատերազմական իրավիճակում ՀՀ-ին «կրակի հրահանգ» տվողը լինելու է տարածաշրջանային ռուս պաշտոնյան, Սեյրան Օհանյանը հակադարձեց. «Խաղաղ պայմաններում եւ պատերազմական ժամանակահատվածում ՀՀ-ում առկա ՀՕՊ եւ ավիացիայի միջոցները պլանավորվելու եւ կիրառվելու են ՀՀ ԶՈՒ, հատկապես` ՀՕՊ եւ ավիացիայի ղեկավարության կողմից` վստահ եղեք դրանում»:
Լուիզա ՍՈՒՔԻԱՍՅԱՆ
