«Ակնհայտ է, որ Ընտրական օրենսգիրքը չէ, որ հարյուր տոկոսով երաշխավորում է ընտրությունների լավ կամ վատ, թափանցիկ, ազնիվ, արդար անցնելը»,- հունիսի 29-ին «Անդրադարձ» մամուլի ակումբում ասաց «Համախմբում» կուսակցության փոխնախագահ Ստեփան Մարգարյանը:
Նա համարում է, որ լավ Ընտրական օրենսգիրք ունենալու պարագայում հնարավոր է հասնել լավ արդյունքների, եթե ապահովվի ամենահիմնական գործոնը, որն իսկապես ընտրությունների ելքն է որոշում: Ըստ նրա, դա հասարակական լայն ակտիվությունն է. «Եթե կա հասարակական լայն ակտիվություն, բավականին լուրջ վերաբերմունք ընտրություններին, ապա վատ օրենսգրքով եւս կատարվում է մաքուր, արդար ընտրություն, որովհետեւ աշխատում է բոլորի համար հավասար: Եթե չկա հասարակական ակտիվություն, բնականաբար, այստեղ արդեն իշխանական լծակները, վարչական լծակները, գումարներ, եւ այլն … ամեն ինչ աշխատում է, եւ առավելությունը մնում է իշխանությանը»:
Ստեփան Մարգարյանը կարծում է, որ Հայաստանի պատմության մեջ լավագույն ընտրություն կարելի է համարել 1990 թվականին տեղի ունեցած ընտրությունները: Նա այդ հանգամանքը պայմանավորում է նրանով, որ հասարակությունը շատ ակտիվ էր, սակայն ընտրական օրենսգիրքը բազմաթիվ բացեր ուներ:
«Այս ընտրական համակարգը ավելի վատն է, քան մենք ունեինք նախկինում: Օրենսգիրքը, եթե դիտարկենք իբրեւ հոդվածների ժողովածու՝ իրավական ձեւակերպումներով, որոնք նկարագրում է, ինչ-որ բան, վատը չէ, այնտեղ ամեն բան ձեւակերպված է: Բայց ինչի՞ մասին է, ինքը շատ արատավոր է»,- ասաց Ստեփան Մարգարյանը:
Կարդացեք նաև
Ամի ՉԻՉԱԿՅԱՆ
