2016թ. հունիսի 28-ին Ստամբուլի Աթաթյուրքի անվան օդանավակայանում տեղի ունեցած ահաբեկչական գործողությունների հետևանքով զոհվել է 36, վիրավորվել շուրջ 150 մարդ։ Այս կապակցությամբ Ադրբեջանի նախագահ Իլհամ Ալիևն իր և ադրբեջանցի ժողովրդի անունից ցավակցել է Թուրքիայի նախագահ Ռեջեփ Թայիփ Էրդողանին։ Այդ մասին տեղեկացնում է Trend լրատվական գործակալությունը։
Ալիևի ցավակցական ուղերձում մասնավորապես ասվում է. «Ստամբուլի Աթաթյուրքի անվան օդանավակայանում տեղի ունեցած պայթյունների հետևանքով մարդկային բազմաթիվ զոհերի և վիրավորների մասին լուրերը շատ տխրեցրել են մեզ։ Տեղի ունեցած դժբախտության կապակցությամբ իմ և ադրբեջանցի ժողովրդի անունից ցավակցում եմ Ձեզ, զոհվածների հարազատներին և մերձավորներին, Թուրքիայի եղբայրական ժողովրդին և ապաքինում են մաղթում վիրավորներին»։
Տեղեկացնենք նաև, որ ահաբեկչության ժամերին Աթաթյուրքի օդանավակայանից նախատեսվում էր իրականացնել Ստամբուլ-Բաքու չվերթը։ Ահաբեկչության կատարման պահին Ստամբուլ-Բաքու չվերթի ուղևորների գրանցման գործընթացն արդեն ավարտվել էր, իսկ ուղևորները սպասման սրահում սպասում էին մինչև կհրավիրվեն Բաքու մեկնող ինքնաթիռ։ Հաղորդվում է, որ ահաբեկչության պահին դեպքի բուն վայրում չեն եղել ադրբեջանցիներ։
Կարդացեք նաև
