ՀՀ ՊՆ մարդու իրավունքների և բարեվարքության կենտրոնի գործառույթներին, կարողություններին և ենթակառուցվածքներին ծանոթանալու նպատակով հունիսի 28-ին պաշտպանության նախարարություն է այցելել ՀՀ-ում ԱՄՆ արտակարգ և լիազոր դեսպան Ռիչարդ Միլսի գլխավորած պատվիրակությունը:
Այցելության շրջանակում հյուրերը հանդիպել են ՀՀ պաշտպանության նախարարի առաջին տեղակալ Դավիթ Տոնոյանի հետ: Հանդիպման ընթացքում քննարկվել են ՀՀ զինված ուժերում մարդու իրավունքների պաշտպանության կարողությունների և մեխանիզմների զարգացման, պաշտպանական քաղաքականության շրջանակում մարդու իրավունքների և բարեվարքության հայեցակարգերի ինտեգրման, հակակոռուպցիոն ծրագրերի մշակման հետ կապված հարցեր, ինչպես նաև դիտարկվել են համագործակցության նոր ուղղությունների զարգացման հնարավորությունները:
ՀՀ պաշտպանության նախարարի առաջին տեղակալ Դավիթ Տոնոյանի ուղեկցությամբ պատվիրակության անդամներն այցելել են ՀՀ ՊՆ մարդու իրավունքների և բարեվարքության կենտրոն, որտեղ ՀՀ պաշտպանության նախարարի ավագ օգնական – Կենտրոնի պետ, փոխգնդապետ Ա. Ավետիսյանը հյուրերին ներկայացրել է Կենտրոնի գործունեության հիմնական ուղղությունները:
Իր խոսքում դեսպան Միլսը նշել է. «Աշխարհով մեկ ԱՄՆ կառավարության հիմնական գերակայություններից մեկը մարդու իրավունքների ամրապնդումն է և աշխատանքը մեր գործընկերների հետ՝ մարդու իրավունքների իրացումն ու պաշտպանվածությունը բոլորի համար երաշխավորելու նպատակով:
Գոհացուցիչ է տեսնել այս կարևոր հարցի շուրջ ՀՀ պաշտպանության նախարարության աշխատանքն այնպիսի գործընկերների հետ, ինչպիսիք են կրթական փորձագետները, քաղաքացիական հասարակությունը: Զինված ուժերը, որտեղ հարգում են մարդու իրավունքները, որտեղ պայքարում են կոռուպցիայի ու չարաշահումների դեմ, ամուր է ու հզոր, և ժողովուրդը կարող է հպարտանալ իր զինված ուժերով»:
Կարդացեք նաև
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅԱՆ
ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ
