«Ապրիլյան պատերազմը ցույց տվեց, որ կոռուպցիան Հայաստանում ունի արյան գին»,-«Օպերա Սյութ» հյուրանոցում կազմակերպված քննարկման ժամանակ ասաց Բաց հասարակություն հիմնադրամներ-Հայաստանի փոխտնօրեն Դավիթ Ամիրյանը: Այսօր «Թրանսփարենսի ինթերնեշնլ» հակակոռուպցիոն կենտրոնի նախաձեռնությամբ տեղի ունեցավ «Գնումների մասին» նոր օրենքի նախագծի հանրային քննարկումը:
Պարոն Ամիրյանը կարծիք հայտնեց, որ առանց վճռական քայլեր կատարելու՝ խնդիրը լուծել չի լինի. «Ստացվում է, որ ապրանքների եւ ծառայության ձեռքբերումներով է պայմանավորված պետություն, երկիր, հող ունենալ-չունենալու հարցը»:
ՀՀ ֆինանսների նախարարության պետական ներքին ֆինանսական հսկողության եւ պետական գնումների մեթոդաբանության վարչության պետ Սերգեյ Շահնազարյանը ներկայացրեց նախագծում նախատեսվող փոփոխությունները: Ըստ նրա, հիմնական փոփոխություններից է գնման ընթացակարգերի համապատասխանեցումը ԵԱՏՄ պահանջներին:
Մեկ այլ փոփոխություն վերաբերում է «սեւ ցուցակում» հայտնված կազմակերպությունների ներառման պայմանների փոփոխության հարցին: Ներկայիս օրենքով «սեւ ցուցակում» գտնվելու ժամկետը 6 ամսից 3 տարի է, ԵԱՏՄ համաձայնագրով այդ ժամկետը հստակ ֆիքսված է եւ չի կարող պակաս լինել, քան երկու տարին:
Կարդացեք նաև
Դավիթ Ամիրյանը հետաքրքրվեց, թե ինչպիսի փոփոխություններ են նախատեսվում բուհերի գնումների գործընթացում, քանի որ գործող օրենքով այնքան ձգձգվում էր այդ գնումը, որ ասենք` բուհի համար գնված համակարգիչը կամ այս կամ այն գիրքն այլեւս պետք չի լինում:
Մանրամասները` տեսանյութում
Ի պատասխան, Սերգեյ Շահնազարյանն ասաց. «Նախ` առաջինը գնումների համակարգում, ոչ ոք երջանիկ չի լինում, դուք չեք կարող գտնել երջանիկ պատվիրատու եւ չեք կարող գտնել երջանիկ մատակարարներ: Միշտ կան դժգոհություններ»:
Շահնազարյանը սակայն չի կարծում, որ օրենքն այդքան բարդեցված է, այլ, նրա համոզմամբ, հարցն օրենքի կարգավորումներն են եւ խնդիր կարող է առաջանալ օրենքը կիրառողների պատճառով:
«Թրանսփարենսի ինթերնեշնլ» հակակոռուպցիոն կենտրոնի փորձագետ Արտակ Մանուկյանը համամիտ էր ֆիննախի պաշտոնյայի հետ, ասելով, որ հաճախ գնումների մասնագետը խնդրի ոչ պատշաճ տիրապետումը բարդում է գնումների մասին օրենսդրության վրա: Այդուհանդերձ պարոն Մանուկյանը գտնում էր, որ ֆիննախի վերապատրաստման եւ ուսուցման ծրագրերի որակը շատ հեռու է պահանջներից:
Պարոն Մանուկյանի խոսքի շարունակությունը` տեսանյութում
Քննարկմանը մասնակից Վերահսկիչ պալատի ներկայացուցիչ Կարեն Առուստամյանը հետաքրքրվեց, թե նոր օրենքը պատասխանատվության մեխանիզմներ նախատեսո՞ւմ է:
Պարոն Շահնազարյանն ասաց, որ ինչը կոլեգիալ անպատասխանատվություն է եւ որ գնումների մասին օրենքն այն փաստաթուղթը չէ, որ պատասխանատվություն նախատեսի. «Դա արդեն նախատեսված է Քաղաքացիական օրենսգրքով կամ Քրեականով»:
Լուսինե ԲՈՒԴԱՂՅԱՆ
