«Հայաստանի ամենաազդեցիկ քաղաքական ուժի ղեկավարը պետք է ունենա իր կարծիքը: Պարոն նախագահն արտահայտել է իր կարծիքը, և այն օբյեկտիվ է, տրամաբանական ու ընդունելի: Այսօր Հայաստանի ամենաազդեցիկ քաղաքական ուժը Հանրապետական կուսակցությունն է: Կուսակցության վարկանիշը բարձր բղավելով չէ, առաջիկայում Գյումրիում եւ Վանաձորում ընտրություններ են, տեսնենք, թե քանի ձայն կհավաքեն այն քաղաքական ուժերը, որոնք բարձր խոսում են»,- խորհրդարանում լրագրողների հետ զրույցում ասաց ԱԺ փոխխոսնակ Էդուարդ Շարմազանովը`պատասխանելով լրագրողների հարցերին`երեկ Reuters գործակալությանը ՀՀ նախագահ Սերժ Սարգսյանի հարցազրույցի վերաբերյալ:
Սերժ Սարգսյանն այդ հարցազրույցում ասել էր, որ ՀՀԿ-ն հաղթելու է առաջիկա խորհրդարանական ընտրություններում, եթե չհաղթի, ինքը քաղաքականության մեջ անելիք չունի: Լրագրողի ճշտող հարցին էլ` նման բան ակնկալո՞ւմ է, նախագահն արձագանքում է ծիծաղով. «Ոչ»։
Լրագրողների դիտարկումներին ի պատասխան, որ Հայաստանում միակուսակցական համակարգ է ձեւավորվում, Էդուարդ Շարմազանովն ասաց. «Մենք բաց ենք մրցակցել բոլոր քաղաքական ուժերի հետ: Միակուսակցական համակարգի մասին խոսելը ծիծաղելի է, բոլորը իրավունք ունեն մասնակցել ընտրություններին: Մենք բոլորին հրավիրում ենք բաց, ազատ, թափանցիկ մրցակցության: Այդքան բարձր բացականչելու փոխարեն՝ լավ կլինի մասնակցել ընտրություններին: Մենք այդ իմաստով բաց ենք, մեր հանրությունը կորոշի: Հանրությունը չի ցանկանում ընտրել Սերժ Սարգսյանի ղեկավարած քաղաքական ուժին, թող ընտրի Պողոս Պողոսյանի գլխավորած ուժին»:
Լրագրողներից մեկի հարցին՝ ՀՀԿ-ն անհա՞ղթ է, ԱԺ փոխնախագահն ասաց. «Անհաղթ է միայն Աստված եւ հայ ժողովուրդը»: Իսկ որտեղի՞ց այդքան վստահություն, որ ՀՀԿ-ն հաղթելու է առաջիկա ընտրություններում, Էդուարդ Շարմազանովն ասաց, որ կան կուսակցություններ, որոնք «ոտքից գլուխ 7 հոգի են, 9.5 ձայն ունեն», սակայն այնպես են խոսում, որ թվում է, թե եթե առաջիկայում ընտրություններ լինեն, իրենք 80 տոկոս ձայն կհավաքեն:
Կարդացեք նաև
«Հայաստանի նախագահ Սերժ Սարգսյանը մինչեւ 2018թ. իր ամբողջ լիազորություններով շարունակելու է պաշտոնավարել, դրա համար հիմա կոռեկտ չէ խոսել նման բաների մասին: Օրը կգա, բարին հետը, դանդաղ շտապեք»,- ասաց ԱԺ փոխխոսնակը` պատասխանելով հարցին, թե ո՞ր պաշտոնում է ինքը տեսնում Սերժ Սարգսյանին:
Նելլի ԳՐԻԳՈՐՅԱՆ
Կոմունիստները նույնպես միակ ազդեցիկ ուժն էին,քանի դեռ իշխանությունը իրենց ձեռքում էր,իսկ առանց իշխանության տեսեք թե ինչ ողբալի վիճակում են.