«Հայաստանը չի կարող ռազմական ոլորտին առնչվող նման պայմանագրեր կնքել` առանց Արցախի համաձայնության: Որքանո՞վ է ՀՀ-ն այսուհետեւ ազատ լինելու իր գործողություններում` Արցախի օդային տարածք ներխուժած թիրախները խփելու որոշում կայացնելուց»,-ՀՀ-ի եւ ՌԴ-ի միջեւ ՀՕՊ միասնական համակարգ ստեղծելու համաձայնագրի շուրջ այսպիսի հարցադրում է անում «Նոր Հայաստան» հանրային փրկության ճակատի անդամ Անդրիաս Ղուկասյանը:
Այսօր ԱԺ-ի դիմաց համաձայնագրի հնարավոր վավերացման դեմ կազմակերպված բողոքի ցույցի ժամանակ նա Aravot.am-ի հետ զրույցում ասաց, որ Բակո Սահակյանի լռությունը խնդրահարույց է. «Նրանք, ովքեր մասնակցում են այդ պայմանագրի ընդունմանը, խնդիր ունեն վաղը պատասխան տալու, եթե Ադրբեջանն Արցախի դեմ օդային ուժեր կիրառի, իսկ Արցախն ի վիճակի չլինի իր ՀՕՊ-ով պաշտպանվել, եւ եթե այս միջպետական համաձայնագրով չգործի ՀՀ-ի ՀՕՊ-ը»:
Ըստ Անդրիաս Ղուկասյանի` նշյալ համաձայնագրով ՀՀ-ն իր ռազմավարական կառավարման հարցերը լիազորում է լուծել ՌԴ-ին. «Տեղում կառավարումը մնում է ՀՀ-ին, բայց ռազմավարության հետագա զարգացման վերաբերյալ հարցերն անցնում են ՌԴ ռազմական ղեկավարությանը: Այս քայլով ՀՀ-ն նաեւ ՆԱՏՕ-ի համար թիրախ է դառնում, վերջինիս եւ ՌԴ-ի միջեւ հակամարտություն կա, որի մեջ մենք էլ ենք ներքաշվում: Չեմ կարծում, որ մեր ժողովուրդը ցանկանում է` ՆԱՏՕ-ի միջուկային հրթիռներն ուղղվեն ՀՀ-ին: Բայց այս համաձայնագիրը քայլ է այդ ուղղությամբ»:
Կարդացեք նաև
Լուիզա ՍՈՒՔԻԱՍՅԱՆ
