«Ադրբեջանի նախագահն իր ամպուլայի մեջ էր: Նրա հայտարարությունները լի էին պատմական անճշտություններով»,-խորհրդարանում լրագրողների հետ զրույցում ասաց ԱԺ փոխնախագահ Էդուարդ Շարմազանովն`անդրադառնալով Ադրբեջանի նախագահ Իլհամ Ալիեւի`Սանկտ-Պետերբուրգի հանդիպման մասով արած գաղտնազերծումներին:
«Հարցը պետք է լուծվի Ադրբեջանի տարածքային ամբողջականության շրջանակներում։ Ադրբեջանի պատմական հողերի վրա Լեռնային Ղարաբաղը երբեք ձեռք չի բերի անկախություն, երբեք չի ստեղծվի հայկական երկրորդ պետականություն։ Սա գլխավոր հարցն է: Ինչ վերաբերվում է Լեռնային Ղարաբաղի կարգավիճակին, դա ապագայի հարց է։ Իհարկե, որոշակի կարգավիճակ կարող է տրվել։ Ադրբեջանի կազմում կա Նախիջևանի Ինքնավար Հանրապետությունը։ Եվրոպայում, այլ պետություններում զարգացող փորձեր և տարբեր կարգավիճակներ կան, բայց այդ կարգավիճակը չպետք է խախտի Ադրբեջանի տարածքային ամբողջականությունը»,- ասել էր Ադրբեջանի նախագահը` նաեւ հավելելով, որ այս փուլում անհրաժեշտություն չի տեսնում հետաքննության մեխանիզմների տեղակայման համար:
«Կարծում եմ, որ այստեղ Մինսկի խմբի համանախագահ երկրները պետք է իրենց դիրքորոշումը ցույց տան Ալիեւի նման հետքայլի եւ մերժողական մոտեցման հետ կապված»,- ասաց Էդուարդ Շարմազանովը:
ԱԺ փոխնախագահը նշեց, որ Լեռնային Ղարաբաղը ոչ մի կարգավիճակով չի կարող ընդգրկվել Ադրբեջանի կազմում: Ղարաբաղի ժողովուրդը, նախկինում ԼՂ ինքնավար մարզը երբեք չի եղել Ադրբեջանի կազմում, Ալիեւն էլ բլեֆ է անում:
Կարդացեք նաև
«Պարոն Ալիեւը չի Ղարաբաղի ժողովրդին անկախություն տվողը: Աստված է տալիս յուրաքանչյուր ազգին ազատության եւ անկախության ձգտումը: Միջազգային իրավունքն էլ այդ իրավունքը ընձեռում է ցանկացած ժողովրդին, այդ թվում նաեւ Արցախի ժողովրդին: Ինձ համար առնվազն տարօրինակ է, թե ինչու Մեծ Բրիտանիայի ժողովուրդն իրավունք ունի հանրաքվեով որոշել՝ մնա՞լ ԵՄ կազմում, թե` ոչ, Շոտլանդիան իրավունք ունի հանրաքվեի միջոցով իր կարծիքն արտահայտել, Կոսովոն ինքնորոշման իրավունք ունի, հենց հերթը հասնում է ԼՂ ինքնորոշման իրավունքի իրացմանը, հայտնվում են դեմքեր, ովքեր հարցականի տակ են առնում: ԼՂ ինքնորոշման իրավունքի իրացումը, կամարտահայտությունը երբեք չի կարող դրվել հարցականի տակ: Լեռնային Ղարաբաղի ժողովուրդը երբեք չի եղել եւ չի լինելու Ադրբեջանի կազմում: Թող Արցախից այն կողմ գտնվող նավթադոլարներով հարուստ երկրում մոռանան դրա մասին»,- ասաց նա:
Այլ մանրամասները`տեսանյութում
Նելլի ԳՐԻԳՈՐՅԱՆ
