Թբիլիսիում հունիսի 25-ին մեկնարկող ծանրամարտի աշխարհի երիտասարդական առաջնությունից առաջ կայացած միջազգային ֆեդերացիայի գործկոմը հակադոպինգային կանոնները պարբերաբար խախտող ազգային ֆեդերացիաների նկատմամբ խիստ պատժամիջոցներ է կիրառել:
Մասնավորապես, Ռուսաստանի, Բելառուսի եւ Ղազախստանի ֆեդերացիաներին մեկ տարվա որակազրկում է սպառնում, եթե Պեկինի եւ Լոնդոնի օլիմպիական խաղերի մասնակից այդ երկրների ծանրորդների՝ ժամանակակից մեթոդներով դոպինգային փորձանմուշների նոր ստուգումները պարզեն, որ երեք եւ ավելի ծանրորդներ արգելված նյութեր են օգտագործած եղել: Այդ դեպքում այդ երկրների ծանրամարտի օլիմպիական հավաքականները կզրկվեն Ռիոյի օլիմպիական խաղերին մասնակցելու իրավունքից: Այս հարցերի պատասխանը ՄՕԿ-ը կտա, հավանաբար, մինչեւ հուլիսի 17-ը:
Սակայն ծանրամարտի միջազգային ֆեդերացիան 31-րդ ամառային օլիմպիական խաղերի նախապատրաստության քառամյա մրցափուլի ընթացքում պարբերաբար հակադոպինգային կանոնները խախտելու համար որոշել է աշխարհի վերջին երկու առաջնությունների ընդհանուր արդյունքով մի քանի երկրների նվաճած քվոտաների քանակը նվազեցնել: Մասնավորապես, Ադրբեջանից՝ 2 (1 տղամարդ եւ 1 կին), Բելառուսից՝ 1 (տղամարդ), Ղազախստանից՝ 2 (1+1), Մոլդովայից՝ 2 (տղամարդ), ԿԺԴՀ-ից՝ 2 (1+1), Ռուսաստանից՝ 2 (1+1), Ռումինիայից՝ 1 (տղամարդ), Ուզբեկստանից՝ 1 (տղամարդ):
Ստացվում է, որ IWF-ն եւ ՄՕԿ-ը մինչեւ օլիմպիական խաղերի մեկնարկը ուղեգիր նվաճած երկրների քվոտաների վերահաշվարկ պետք է կատարեն:
Կարդացեք նաև
ԱՇՈՏ ՀԱԿՈԲՅԱՆ
«Առավոտ»
24.06.2016
