«Եկեք չթերագնահատենք Ադրբեջանին ու ասենք, թե իրենք ոչինչ չեն հասկանում: Գործնականում ճշգրիտ հաշվարկված քայլեր են անում` իր տարբերություն ՀՀ-ի, որն իրավիճակային խնդիրներ է փորձում լուծել»,-Aravot.am-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը` անդրադառնալով Ադրբեջանի նախագահականի պաշտոնյա Նովրուզ Մամեդովի հայտարարությանը, թե Սանկտ Պետերբուրգում պայմանավորվածություն է ձեռք բերվել Ադրբեջանին տարածքներ հանձնելու մասին:
«Ինձ համար միեւնույն է` փուլային տարբերակով հանձնելու մասին է խոսքը, թե փաթեթային: Միանշանակ, դա անընդունելի մոտեցում է: Մտավախություն ունեմ, որ Մամեդովի ասածներում որոշակի հիմք կա, որովհետեւ ոչ միայն ինքն է դրա մասին ասել: Սերժ Սարգսյանը բարձրաձայնեց, որ 2011թ. համաձայնել է դրան: Եթե այդ ժամանակ, երբ Հայաստանն ավելի կայուն վիճակում էր, ու Սերժ Սարգսյանը համաձայնել է, ինչո՞ւ հիմա չպետք է համաձայնի: Այս խնդիրը կա եւ այն մտահոգիչ է»,-ասաց Արմեն Մարտիրոսյանը:
Մեր նկատառմանը, թե ժամանակին Ադրբեջանը մերժեց Կազանյան սկզբունքները, ինչո՞ւ է հիմա նման հայտարարություն արվում, Մարտիրոսյանը պատասխանեց. «Ադրբեջանը միշտ մաքսիմալիստական մոտեցում է ցուցաբերում: Պատահական չէ, որ հինգ շրջանից հետո եւս երկու շրջանի հարց դրեց: Մոտեցումն անընդունելի է: Երբ առաջին անգամ հրապարակվեցին Մադրիդյան սկզբունքները, «Ժառանգությունը» դեմ արտահայտվեց»:
Հիշեցնենք` ՀՀ արտգործնախարարից բացի, Մամեդովի հայտարարությանն արձագանքել էր նաեւ ՌԴ ԱԳՆ ներկայացուցիչը:
Կարդացեք նաև
Լուիզա ՍՈՒՔԻԱՍՅԱՆ
