Հռոմի պապի այցելության մասին խոսելով՝ այսօր ՀՀԿ պատգամավոր Արտակ Դավթյանը «Հայելի» ակումբում ասաց, որ պապի այցելությունը կատարյալ կլիներ, եթե ուխտագնացություն կատարելով Գյումրի, Երեւան, Էջմիածին, նաեւ Շուշի այցելեր:
«Շատ դժվար կլինի պատկերացնել, որ Ադրբեջան կատարելիք այցը նույնպես կլինի ուխտագնացություն: Ադրբեջան ուխտագնացության թող գնան Մադրիդի Ատլետիկոյի ֆուտբոլիստները, որոնց մարզաշապիկներին գրված էր՝ «Հրո երկիր Ադրբեջան»: Երեւի չեն գնում, որովհետեւ կարող է հրո երկրում այրվեն»,- ասաց պարոն Դավթյանը:
Նա ասաց, որ Հռոմի պապի այցելությունը շատ լուրջ քաղաքական ազդակ կլինի Թուրքիային:
Քաղաքագետ Ստյոպա Սաֆարյանը նույնպես կարեւորեց Հռոմի պապի այցը. «Վերին աստիճանի պատմական իրադարձություն եմ դա համարում: Նախկինում էլ է Հռոմի պապը եկել, բայց այն քաղաքական տեքստը եւ կրոնական տեքստը, որը նա թողել է՝ որպես իր այցի մեկնաբանությունը, ասում է, թե որքան կարեւոր է Հայաստանը քրիստոնեական աշխարհի համար: Հիշատակել, որ դա առաջին քրիստոնյա պետությունն է, որ հավատի համար մեծագույն զրկանքներ են կրել եւ պահել են իրենց հավատը, այս քաղաքական աջակցությունը շատ կարեւոր էր այսպիսի վիճակում հայտնված մեր երկրի համար: Եթե չլիներ Հռոմի պապի ելույթը, թերեւս Բունդեսթագում չդատապարտվեր Հայոց ցեղասպանությունը»:
Կարդացեք նաև
Ըստ պարոն Սաֆարյանի, ՀՀ-ն պետք է կարողանա նաեւ տեսնել, թե ինչ հնարավորություններ են բացվում մեզ համար քաղաքական հարթության վրա: PR, իհարկե, լինելու է եւ պետք չի դրանով միայն զմայլվել, պետք է հասկանանք, թե ինչպես դա կապիտալի վերածենք:
Հռիփսիմե ՋԵԲԵՋՅԱՆ
