ԼՂՀ իշխանությունները դիմել են Կարմիր խաչի միջազգային կոմիտեին՝ խնդրելով աջակցել Թալիշում հացահատիկային մշակաբույսերի հնձելու ընթացքում թալիշեցիների անվտանգության պահպանության հարցում։
«Մոտ 500-550 հեկտար աշնանացան հացահատիկային մշակաբույսերի դաշտեր ունենք։ Համապատասխան գրությամբ դիմել ենք, ամբողջ տարածքն ուսումնասիրվել է, Կարմիր խաչը պատրաստակամություն է հայտնել պայմանավորվել հակառակորդի ներկայացուցիչների հետ, որ անվտանգությունը ապահովեն։ Առաջիկա մի քանի օրերին կհնձենք հացահատիկի արտերը»,- ասաց Թալիշի գյուղապետ Վիլեն Պետրոսյանը։
Ըստ նրա՝ Թալիշում թեեւ որոշակի հանգստություն կա, սակայն դա վերջնական խաղաղություն չէ, եւ հետեւաբար իրենք չեն կարող ռիսկի դիմել ու բնակչությանը վերադարձնել իրենց տները։
«Թալիշում գիշերում են այն մարդիկ, որոնք աշխատանքի հետ կապված գտնվում են այնտեղ եւ հարմար է, որ մնան Թալիշում։ Դրանք ոչ թե ընտանիքներ են, այլ ընտանիքների տղամարդիկ։ Մեկը գնում է Թալիշ,
Կարդացեք նաև
որովհետեւ ընդգրկված է պաշտպանության բանակում, մեկն աշխատում է «Մատաղիս» ՀԷԿ-ում, մյուսը՝ «Ղարաբաղ տելեկոմի» աշխատակից է եւ այլն, եւ այլն։ Այնպես չի, որ ընտանիքները չեն ուզում իրենց հայրենի գյուղում բնակվել, ուղղակի անվտանգության երաշխիք է պետք, որ գնան այնտեղ։ Երաշխիքը լինելու դեպքում էսօր Թալիշի բնակչության 25, 30, 40 տոկոսն այնտեղ բնակեցված կլիներ»,- պարզաբանեց Պետրոսյանը։
Սյուզաննա ՊՈՂՈՍՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
