ԱՆԺԱՄԱՆՑԵԼԻ ԱՄԲԱՍՏԱՆԱԳԻՐ
ՊԱՐՍԱՎԱՆՔ ՈՒ ՊԱԽԱՐԱԿՈՒԹՅՈՒՆ ԲՌՆՈՒԹՅՈՒՆ ԿԻՐԱՌՈՂ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԻՇԽԱՆԱՎՈՐԻՆ
Տարվա մեծագույն սկանդալը` ռազմաքաղաքական գործիչ, ՀՀ ԶՈՒ փոխգնդապետ, ժողովրդական ձայնի և խղճի դրոշակակիր Ժիրայր Սեֆիլյանի ձերբակալությունը, ՀՀ-ում բարոյահոգեբանական մերօրյա գորշ մթնոլորտի, ադրբեջանական դեմարշի, սպառազինության աննախադեպ ընթացքի և նրա կողմից մեր հայրենիքի մի մասի գրավման ներկա պայմաններում հայության բոլոր չափանիշներով համարում ենք մեծագույն ոճիր և դատամոլ իշխանություններից պահանջում ենք անհապաղ ազատ արձակել մեր հաղթանակների ու անպարտելիության խորհրդանիշին:
Տոկուն զորահրամանատարի և պետական գործչի հանդեպ կատարվող սույն չարագործությունն ու շարունակվող քաղաքական թատրոնը հանդուգն մարտահրավեր է ազնվությանն ու ժողովրդին նվիրված ապրելու գաղափարին, խիստ մեղադրելի հաշվեհարդար է ժողովրդական ձայնի և խղճի նկատմամբ և Հայրենիք-Սփյուռք կամրջի գիտակցված քանդում է նշանակում:
Կարդացեք նաև
Ժիրայր Սեֆիլյանին չեզոքացնելը մեր այս զգայուն օրերին հավասարազոր է Արցախը հանձնելու գործընթացի սկիզբը հայտարարելուն և նրա անազատության մեջ գտնված յուրաքանչյուր րոպեն Արցախի անվտանգության թուլացման և մեր ժողովրդի ոգու կոտրման րոպեն է:
Գերմանիայի Հայ Ակադեմիականների Միության վարչությունը կոչ է անում իր անդամներին, գերմանահայ համայնքներին ու կազմակերպություններին, բայց նաև իր բոլոր ազնիվ հայրենակիցներին, ում համար թանկ են հայրենի երկրի ճակատագիրն ու ժողովրդի իղձերը, հենց այսօրվանից և այնքան ժամանակ, քանի դեռ Ժիրայր Սեֆիլյան նվիրյալը անազատության մեջ է, սառեցնել բոլոր տեսակի կապերն ու հարաբերությունները ՀՀ իշխանությունների հետ, բոլոր հնարավոր բեմերից պայքարել, պահանջել և քարոզել մեղազուրկ հերոսին վայրկյան առաջ ազատ արձակելու գաղափարը, ինչպես նաև դադարեցնել քաղաքական հալածանքները հայրենի երկրում:
Ժեռ բանտից Մհերը դուրս պետք է գա, այն էլ սպիտակ նժույգին հեծած:
Հարգանքներով`
Հայ Ակադեմիականների Միություն – 1860
22 հունիսի 2016թ.
Բոխում, Գերմանիա
