Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանն այսօր ոստիկան Վարդան Ապրեսյանի հարցաքննությունից հետո հայտարարությամբ հանդես եկավ:
«Պարզ դարձավ, որ ոստիկանությունը հրահանգավորում է, որ իրավախախտումը կանխելու համար ոստիկանները իրավախախտին երկու կողմից բռնեն, բայց Գեղամ Խաչատրյանը, անտեսելով ոստիկանության հրահանգավորումը, մոտեցավ ու գետնին տապալեց Հովհաննես Ղազարյանին: Գեղամ Խաչատրյանը գնաց այդ սադրանքին, որ բախում հրահրի: Նրանք սպասում էին, որ ես կհարվածեի ու ինձ կձերբակալեին, բայց ես դա չարեցի:
Ես չհարվածեցի Գեղամ Խաչատրյանին, չնայած դրա իրավունքն ունեի, եթե Գեղամ Խաչատրյանն այդ օրն ունեցել է վնասվածք, հարց է առաջանում՝ որտեղից. Տեսագրություններում տեսանք ՝ միջադեպն ավարտվել էր, նա վնասվածք չուներ: Այստեղ կա մի տրամաբանական պատասխան, ոստիկանները, տեսնելով որ իրենց սադրանքը չիրականացավ, մի մութ անկյունում հարվածեցին Գեղամ Խաչատրյանին, որ հետո ասեն՝ Գեւորգն եկավ, խփեց, արյունահոսեց: Սա հատուկ կազմակերպված քաղաքական պրովոկացիա էր, որ ինձ քաղաքական ճնշումների ենթարկեն»,- ասաց Գեւորգ Սաֆարյանը:
Ըստ նրա, իշխանությունները, օգտագործելով քննչական մարմնին ու դատախազությանը, քաղաքական հետապնդում են իրականացնում իր նկատմամբ. «Քաղաքական հետապնդման ապացույց է նաեւ «Հիմնադիր խորհրդարանի» վարչության անդամ Ժիրայր Սեֆիլյանին ֆիկտիվ մեղադրանքով ձերբակալելը: Իմ նկատմամբ հարուցված քրեական գործում իրավական ընթացք չկա, սա իշխանությունների կողմից իրականացվող քաղաքական ճնշումների հետեւանք է»:
Կարդացեք նաև
Ի դեպ, դատարանը թույլ չտվեց Գեւորգ Սաֆարյանին անդրադառնալ Ժիրայր Սեֆիլյանի կալանավորմանը, հորդորեց խոսել իր գործոնի վերաբերյալ ու ըստ էության:
Արփինե ՍԻՄՈՆՅԱՆ
Անհապաղ դադարեցնել Գեւորգ Սաֆարյանի նկատմամբ քաղաքական դրդապատճառներով քրեական հետապնդումը։