«Ադրբեջանի անիմաստ եւ ապուշ հայտարարություններին արձագանքել եւ դրանք քննարկել պետք չէ»,-վստահ է ԱԺ պատգամավոր Թեւան Պողոսյանը: «Տեսակետ» մամուլի ակումբում հունիսի 23-ին նա անդրադարձավ Ադրբեջանի նախագահի աշխատակազմի արտաքին կապերի բաժնի ղեկավար Նովրուզ Մամեդովի հայտարարությանը, թե իբր Սանկտ Պետերբուրգում պայմանավորվածություն է ձեռք բերվել Ադրբեջանին հանձնել Արցախի մի շարք շրջաններ:
«Պետք է այնպես անենք, որ Ադրբեջանում քննարկեն հայկական օրակարգային թեմաները, մասնավորապես այն, որ Արցախը պետք է վերադառնա բանակցային սեղանի շուրջը: Այդ իրենք պետք է արթնանան եւ վախենան, թե հայկական կողմն ինչ նոր քայլեր եւ հայտարարություններ է անելու: Ոչ թե մեր պես տեսնենք` ո՞ր ադրբեջանցին ինչ է ասել ու քննարկենք»,- ասաց Թեւան Պողոսյանը:
Նա կարծում է, որ Մամեդովի հայտարարությունն իրականում ադրբեջանական դիվանագիտության հաշվարկված քայլերից է, որը նպատակ ունի հայության շրջանում քննարկման թեմա դառնալ: «Անիմաստ մտավարժանքներ են նման խոսակցությունները: Այդ հայտարարությունն այն է, ինչը որպես փաստաթուղթ 2011թ. Կազանում մերժեց Ադրբեջանը: Եթե մերժել է, հիմա ի՞նչ է ստացվում` համաձայնվե՞լ է…»,-հարցադրում արեց պատգամավորը:
Կարդացեք նաև
Լուիզա ՍՈՒՔԻԱՍՅԱՆ
