Թուրքիայի նախագահական նստավայրի մամուլի խոսնակ Իբրահիմ Քալընը կրկին անդրադարձել է 2016թ. հունիսի 2-ին Գերմանիայի խորհրդարանում ընդունված Հայոց ցեղասպանության ճանաչման բանաձևին։ Այս մասին տեղեկացնում է թուրքական «Հաբերլեր» լրատվական գործակալությանը։
Խոսելով Բունդեսթագի ընդունած որոշման մասին՝ Քալընն ասել է. «Անհնար է, որ մենք ընդունենք Թուրքիայի, թուրք ժողովրդի հասցեին հնչած այդ անհիմն մեղադրանքը։ Մենք արդեն ասել ենք, որ դրանք ընդհանուր ցավեր են (թուրքական պաշտոնական դիրքորոշման համաձայն 20-րդ դարասկզբին տեղի են ունեցել ցավալի իրադարձություններ, որոնց հետևանքով տուժել են ինչպես հայերը, այնպես էլ թուրքերը,-խմբ.)։ Նրանք մեր հայերն էին։ Ի՞նչ է, 700 տարի հայերի հետ ապրելուց հետո մենք որոշել էինք կոտորե՞լ նրանց։ Դա չունի տրամաբանական բացատրություն»։
