«Ծեծուջարդը եւ քաղաքական գործիչների վրա հարձակումները դադարեցնելու համար ՀՀԿ-ն ունի առաջնային պարտականություն` հանդես գալ առաջարկով, որ բոլոր կուսակցությունները պետք է կնքեն քաղաքական դաշտում ուժ չգործադրելու եւ բռնությունից հրաժարվելու մասին համաձայնագիր: Դրա մի կողմում պետք է լինեն իշխանական կուսակցությունները, մյուս կողմում` ընդդիմադիրները»,-այս մասին հունիսի 22-ին «Հիմնադիր Խորհրդարան»-ի գրասենյակում լրագրողների հետ հանդիպմանը հայտարարեց «Հիմնադիր Խորհրդարան»-ի անդամ Անդրիաս Ղուկասյանը:
Նրա խոսքով` իշխանությունը խնդիր ունի ցույց տալու, որ պատրաստ է առանց բռնության քաղաքական գործունեություն իրականացնել. «Եթե դա չարվեց, այն վնասը, որը պատճառվել է ՀՀ-ին Ժիրայր Սեֆիլյանի ձերբակալությամբ, դառնալու է իմիջային կորուստ եւ բացասական է ազդելու մեր ժողովրդի ազգային անվտանգության համակարգի վրա»:
Ղուկասյանը հիշեցրեց, որ մայիսի 20-ին Ժիրայր Սեֆիլյանը հայտարարել էր, որ պատրաստ է իր կյանքը զոհաբերել Արցախի տարածքային ամբողջականությունը վերականգնելու գործին. «Մեր տեղեկություններով` մայիսի 20-ին նման միջադեպ` ավտովթար չի եղել, որ ձերբակալվեն ինքնաձիգերով մարդիկ»:
Հիշեցնենք` ըստ ՀՀ քննչական կոմիտեի` 2016թ. մայիսի 20-ին տեղի ունեցած ճանապարհատրանսպորտային պատահարի վայրում հայտնաբերվել են Ժիրայր Սեֆիլյանի կազմակերպմամբ խմբի կողմից ապօրինի կերպով շրջանառվող երկու միավոր զենքն ու ռազմամթերքը:
Կարդացեք նաև
Լուիզա ՍՈՒՔԻԱՍՅԱՆ
