Ինչպես արդեն տեղեկացրել ենք այսօր Ստրասբուրգում Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստին քննարկվեց «Ժողովրդավարական ինստիտուտների գործունեությունը Թուրքիայում» զեկույցը: Այն ներկայացրին հեղինակներ՝ Նորվեգիայի պատգամավոր Ինգեբյորգ Գոդսկեսենի և Սերբիայի պատգամավոր Նատաշա Վուցկովիչը:
Այնուհետև ԵԽԽՎ պատվիրակներն իրենց մտահոգությունները հայտնեցին Թուրքիայի ժողովրդավարական ինստիտուտների գործունեության ոլորտում գոյություն ունեցող խնդիրների վերաբերյալ: Օրինակ` հոլանդացի պատգամավոր Փիթեր Օմցիգը (լուսանկարում) հայտարարեց. «Թուրքիան, ով ԵԽ հիմնադիր անդամներից է մինչև այժմ ունի պարետային ժամի օրենքներ, ինչը հակասում է Վենետիկի հանձնաժողովի մոտեցումներին»: Պարոն Օմցիգը մտահոգություն հայտնեց, որ 1,6 միլիոն մարդ արտագաղթել է երկրից, հարավ արևելքի ռազմական գործողությունների պատճառով:
Պատվիրակը խոսեց նաև հետապնդումների մասին, մասնավորապես, որ միայն 2000 մարդու նկատմամբ հետապնդում է սկսվել՝ Էրդողանին վիրավորելու համար։ Նա նաև փաստեց, որ այս հետապնդումները տեղի են ունենում Եվրոպայի ողջ տարածքում ու պատմեց, որ Նիդերլանդներում թուրքական խորհուրդը հորդորել է Թուրքիայի դեսպանատանը հայտնել Էրդողանին վիրավորելու դեպքերի մասին:
Եզրափակիչ հատվածում պարոն Օմցիգը առաջարկեց սկսել մոնիտորինգային գործընթաց Թուրքիայի նկատմամբ:
Կարդացեք նաև
Քննադատական ելույթներով հանդես եկան նաև այլ պատվիրակներ. հիմնական թիրախը Թուրքիայում հետապնդումներն ու ժողովրդավարական ինստիտուտների գործունեության ոչ բարվոք վիճակն էր: Պատվիրակները նկատում էին, որ այս ոլորտում Թուրքիան առաջընթաց չի գրանցել:
Սակայն նշենք, որ քիչ չէին նաև Թուրքիային պաշտպանող պատվիրակները` արդարացնելով, թե նա ունի փախստականների խնդիր և այլն:
Տեղեկացնենք, որ Թուրքիայում ժողովրդավարության ոլորտում գոյություն ունեցող խնդիրներին նվիրված քննարկումը կշարունակվի նաև երեկոյան` Երևանի ժամանակով 18.30-ից հետո: Այնուհետև զեկույցը կդրվի քվեարկության:
Տաթև ՀԱՐՈՒԹՅՈՒՆՅԱՆ
