Լոնդոնի նախկին քաղաքապետ, Եվրամիությունից Մեծ Բրիտանիայի դուրս գալու ակտիվ կողմնակից Բորիս Ջոնսոնը քարոզչական վերջին ելույթներն է ունեցել 2016թ. հունիսի 23-ին Մեծ Բրիտանիայում և Ջիբրալթարում տեղի ունենալիք հանրաքվեից առաջ, որի ընթացքում քվեարկողները պետք է որոշեն՝ ցանկանո՞ւմ է արդյոք Մեծ Բրիտանիան դուրս գալ Եվրամիությունիc, թե՞ ոչ։ Այս մասին տեղեկացնում է բրիտանական The Telegraph-ը։
Իր ելույթի ընթացքում Լոնդոնի նախկին քաղաքապետ Ջոնսոնն ասել է, որ հանրաքվեի անցկացման օրը կարող է Բրիտանիայի անկախության օրը դառնալ։
Հատկապես սուր բանավեճ է ընթացել Ջոնսոնի և Լոնդոնի ներկայիս քաղաքապետ Սադիկ Խանի միջև, վերջինս մեղադրել է Եվրամիությունից Մեծ Բրիտանիայի դուրս գալու կողմնակիցներին, թե նրանք վախեցնում են բրիտանացիներին՝ սպառնալիքով, որ առաջիկայում Թուրքիան անդամակցելու է Եվրամիությանը, որին կտրականապես դեմ է բրիտանացիների ճնշող մեծամասնությունը։ Խանն ասել է, որ Եվրամիությունում որևէ մեկը Թուրքիայի հետ կապված նախագծեր չունի։
Տեղեկացնենք, որ վաղը կայանալիք հանրաքվեն երրորդն է Մեծ Բրիտանիայի պատմության ընթացքում, որի միջոցով պետք է պարզվի՝ ցանկանո՞ւմ են արդյոք բրիտանացիները մնալ Եվրամիության կազմում։ Նմանատիպ առաջին հանրաքվեն տեղի է ունեցել 1975թ., երբ բրիտանացիները կողմ արտահայտվեցին անդամակցությանը։ Արդեն 2011թ. բրիտանացիները մերժեցին ազգային ընտրական համակարգում առաջարկվող փոփոխությունների փաթեթը։
Կարդացեք նաև
