Միջազգային օլիմպիական կոմիտեի եւ առաջատար մարզական ֆեդերացիաների ղեկավար կազմերը երեկ Լոզանում կայացած ՄՕԿ-ի վեհաժողովում միաձայն հավանություն տվեցին թեթեւաթլետիկական ֆեդերացիաների ասոցիացիայի՝ Ռուսաստանի թեթեւ աթլետիկայի հավաքականին Ռիո դե Ժանեյրոյի ամառային օլիմպիական խաղերին մասնակցել թույլ չտալու որոշմանը: Դա անսպասելի չէր, քանի որ ավելի վաղ ՄՕԿ-ի գործկոմը լիակատար հարգում, ողջունում եւ աջակցում է այդ մարզական կազմակերպության դիրքորոշումը:
Այդ դիրքորոշումը մեկ անգամ եւս հաստատեց ՄՕԿ-ի նախագահ Թոմաս Բախը համաժողովից հետո հրավիրված մամուլի ասուլիսում: Նա հասկանալ է տվել, որ Ռիո դե Ժանեյրոյում այս մարզաձեւի այս կամ այն ներկայացուցչի մասնակցությունը IAAF-ի իրավասության ներքո է:
Ավելի վաղ ՄՕԿ-ի օրակարգ էր մտցվել նաեւ դոպինգային խնդիրների հետ կապված ընդհանրապես Ռուսաստանի օլիմպիական հավաքականը Բրազիլիա մեկնելու իրավունքից զրկելու հարցը: Սակայն Միջազգային օլիմպիական կոմիտեն չքննարկեց Ռուսաստանի ԱՕԿ-ը ՄՕԿ-ի կազմից հեռացնելու հարցը: Հետեւաբար, այդ երկրի մյուս մարզաձեւերի ներկայացուցիչներն անարգել կարող են մասնակցել 31-րդ օլիմպիական խաղերին: «ՌԱՕԿ-ի անդամությունը ՄՕԿ-ին չի կասեցվի, քանի որ ԻԱԱՖ-ը իր զեկույցում հստակ նշել է, որ այդ երկրի օլիմպիական կոմիտեն կարեւոր դերակատարություն է ունեցել ռուսական սպորտում դոպինգային ստեղծված իրավիճակում կողմնորոշվելու հարցում», – հայտարարել է Թոմաս Բախը:
ԱՇՈՏ ՀԱԿՈԲՅԱՆ
Կարդացեք նաև
«Առավոտ»
22.06.2016
