Ինչպես հայտնի է, «Քաղցրաշենի ինքնահոս ոռոգման նախագիծ» ծրագիրը վարչապետի կողմից հայտարարվեց թերություններ ունեցող ծրագիր եւ կասեցվեց։
Իհարկե, դժվար է մեր երկրում ակնկալել վնասարարության եւ մասնագիտական անկարողությունների համար պետական պաշտոնյաների պատիժ, բայց զարմանալիորեն նույն գործելակերպն է նկատվում ամերիկյան կառույցի` Համաշխարհային բանկի վարքագծում, որի նպատակներն ու խնդիրներն են աջակցել աղքատության հաղթահարմանը, կրճատմանը, տնտեսությունների զարգացմանը` առանց շրջակա միջավայրին վնաս հասցնելու, ջրամատակարարման արդյունավետության բարձրացմանը, մատուցել խորհրդատվական ծառայություններ, պայքարել կոռուպցիայի դեմ եւ այլն:
Ակնհայտ է, որ այս ֆինանսական կազմակերպությունը չի պահպանել գործունեության ուղղությունները։ Հունիսի 19-ին էլ այդ կազմակերպության բարձր պաշտոնյաներ էին եկել Գառնի, որպեսզի հանդիպեին գառնեցիներին` համոզվելու համար, թե իրո՞ք գառնեցիներն էին դեմ այդ ծրագրին, թե՞ նրանց հետեւում այլ ուժեր են կանգնած:
Պարզվում է, որ եթե գառնեցիք չգիտակցեին այդ ծրագրի աղետալի լինելը, ըմբոստ չլինեին, աղմուկ չբարձրացնեին, ամերիկյան պաշտոնյաները հանգիստ խղճով կշարունակեին վարկավորել-հովանավորել, մեղմ ասած, անորակ ծրագրեր։
Իսկ Գառնին 2 տարի է՝ պայքարում էր, բացահայտում ծրագրի թերությունները եւ բխող հետեւանքները։
Կարդացեք նաև
Նրանց մասնագետները պնդում էին ծրագրի շատ օրիգինալ լինելը եւ արհամարհում էին գառնեցիների հարցադրումները։ Երկու տարի ականջալուր չեղան գոնե գետի ջրերի օբյեկտիվ չափումների տվյալները ունենալու հարցում եւ սառնասրտորեն հաստատեցին ծրագրի վարկավորումը։
Այսպիսով գառնեցիները ակնկալում են ՀԲ-ի երեւանյան գրասենյակի աշխատանքների եւ շարժառիթների համակողմանի ուսումնասիրություն եւ գնահատում իրենց վերադասի կողմից, որպեսզի հետագայում զերծ մնան նման ծրագրեր ֆինանսավորելուց, որոնք վնաս են հասցնելու երկրին եւ ավելացնելու են վարկային բեռը։
ԱՇՈՏ ԱԲԵԼՅԱՆ
«Առավոտ»
21.06.2016
