«Այսօր մեր պատմական հայրենիքի վրա քրդերը մյուսները իրենց իրավունքներն են պաշտպանում, կռիվ են տալիս բոլորը պարտք ու պահանջ ունեն, իսկ Աթեշյանն ամենավերջին պնակալեզի նման թուրքական իշխանությունների կոշիկներն է լիզում հանուն իր բիզնեսի»,- Պոլսո Հայոց պատրիարքի փոխանորդ Արամ արքեպիսկոպոս Աթեշյանի՝ Թուրքիայի նախագահ Ռեջեփ Թայիփ Էրդողանին հղած ափսոսանքի մասին Aravot.am-ի հետ զրույցում ասաց ՀՀ Գիտությունների ազգային ակադեմիայի Մ. Աբեղյանի անվան գրականության ինստիտուտի տնօրեն Վարդան Դևրիկյանը:
Ըստ նրա՝ կան որոշակի սահմաններ՝ «կարմիր գծեր», որ չի կարելի հատել և Աթեշյանը հատել է այդ «կարմիր գիծը». «Նման հոգևորական ինձ համար գոյություն չունի: Մայր Աթոռի յուրաքանչյուր եպիսկոսպոս իրեն ցեխոտված և կեղտոտված պետք է զգա, քանի դեռ Աթեշյանը եպիսկոպոս է:
Այսօր ամբողջ հայ ժողովրդի մեջ կարող ենք ասել մեկը գող է, մեկը՝ կաշառակեր, բայց չենք կարող ասել, որ որևէ մեկը ուրացող է: Միակ ուրացողն այսօր այդ Աթեշյան կոչեցյալն է: Ամոթ է: Եթե նա մտնի Մայր տաճար, ապա պետք է այն վերաօծվի, օրինակ՝ երբ որևէ պիղծ կենդանի մտնում էր սրբատեղի հետո վերաօծում էին: Այնպես որ, նա Հայաստանում որտեղ էլ մտնի այդ վայրը պետք է վերաօծել»:
Պարոն Դևրիկյանի կարծիքով` անհիմն են Մայր Աթոռի՝ Աթեշյանին կարգալույծ անելու իրավունք չունենալու հիմնավորումները. «Մեր այժմյան վեհափառի օրոք երկու եպիսկոպոս կարգալույծ արվել է, հետևաբար երրորդն էլ կարող է լինել, մանավանդ որ նախորդ երկուսի մեղքերը շատ ավելի մեծ չեն եղել, քան սրանը: Նրանք գոնե չեն ուրացել, անգամ որոշակի նպաստ ունեցել են շատ հարցերում:
Կարդացեք նաև
Վեհափառ հայրապետը եպիսկոպոսական ժողովի կամ գերագույն խորհրդի համապատասխան կանոնակարգով կարող է կարգալույծ անել եպիսկոպոսին:
Այլ հարց է, որ եթե հոգևորականը հեղինակություն է վայելում տվյալ թեմում, դա կարող է համապատասխան հակազդեցության բերել, բայց Աթեշյանն այնքան վարկաբեկված կենդանի է, որ որևէ հեղինակություն չունի նաև Կ. Պոլսի հայկական համայնքում, հետևաբար այդ հակազդեցությունն էլ չի կարող լինել»:
Գրականության ինստիտուտի տնօրենը հավելեց, որ եթե փաստարկը ընդունվի, որ Աթեշյանին չի կարելի կարգալույծ անել, պետք է այլևս որևէ հոգևորական կարգալույծ չարվի և նախքան այդ էլ կարգալույծ արվածներին էլ հայտնել, որ հոգևորական կարգի մեջ են:
Արփի ԿԻՐԱԿՈՍՅԱՆ
