Հունիսի 21-ին կայացել են Հայոց պատմություն եւ Քիմիա առարկաների միասնական քննությունները: Ինչպես Aravot.am-ի հետ զրույցում նշեց Գնահատման եւ թեստավորման կենտրոնի (ԳԹԿ) տնօրեն Գագիկ Մելիքյանը (լուսանկարում), քննությունները կազմակերպվել են 15 քննական կենտրոններում:
Հայոց պատմություն առարկայից քննություն է հանձնել 1459, իսկ քիմիայից՝ 1109 դիմորդ: ԳԹԿ տնօրենի խոսքով. «Որեւէ կենտրոնից ահազանգ չի ստացվել, երկու առարկաների թեստերն էլ մաքուր են ու նորմալ: Արմավիրի քննական կենտրոնից մի դիմորդի մոտ հեռախոս են հայտնաբերել ու արտագրելու համար հեռացրել են»:
Ավելի մանրամասն, պարոն Մելիքյանը խոստացավ հայտնել ավելի ուշ:
Ինչ վերաբերում է նախորդ՝ հունիսի 17-ին կայացած մաթեմատիկա առարկայի քննությանը, ԳԹԿ տնօրեն ասաց, որ մաթեմատիկա առարկայի թեստերը ամենահաջողն էին մնացած բոլոր առարկաների թեստերից, մաթեմատիկա առարկայից քննություն հանձնած դիմորդների 51 %-ի գնահատականները կենտրոնացած են միջին բալերի վրա՝ 7,5-13, «կտրվածների» թիվն անցյալ տարվա համեմատ մի քիչ պակասել է՝ 12 %: Այս ցուցանիշը, սակայն, Գագիկ Մելիքյանի վկայությամբ, ավելի բարձր է, համեմատած լեզուներից «կտրվածների» թվի հետ:
Կարդացեք նաև
Գոհար ՀԱԿՈԲՅԱՆ
