«Սանկտպետերբուրգյան հանդիպման տրամաբանությունն այն էր, ինչ դրվել էր Վիեննայում: Նպատակը` բանակցային գործընթացին նախապատրաստվելը: Վիեննայի եւ Սանկտ Պետերբուրգի հանդիպումները լուծում են նախապատրաստական աշխատանքների առաջին մասը` ամեն ինչ անել, որ սահմանում անվտանգ լինի, իսկ դրա հիմնական մեխը տեսնում են դիտորդների թվի մեծացման մեջ: Երկրորդ մեխը հետաքննության մեխանիզմների ներդրումն է: Սանկտ Պետերբուրգում վերահաստատեցին այդ պայմանները կյանքի կոչելու անհրաժեշտությունը»,-հունիսի 20-ին Սանկտ Պետերբուրգում տեղի ունեցած եռակողմ հանդիպումներն այսպես է մեկնաբանում քաղաքագետ Հրանտ Մելիք-Շահնազարյանը:
«Եռակողմ հանդիպումները կարող են նպաստել, որ բանակցային գործընթացը հնարավորինս շուտ վերսկսվի: ՌԴ-ն իր կողմից ամեն ինչ փորձում է անել: Դա Ռուսաստանի հեղինակության խնդիրն է, նա ինչ-որ չափով պատասխանատվություն է ստանձնում ապահովելու անվտանգության միջավայրը»,-հունիսի 21-ին «Փաստարկ» մամուլի ակումբում ասաց Մելիք-Շահնազարյանը:
Քաղաքագետը վստահություն հայտնեց, որ հետաքննության մեխանիզմները եւս կներդրվեն ու կուղղվեն անվտանգության միջավայրի ապահովմանը. «Դա հնարավորություն կտա դիտորդներին ավելի լավ պատկերացնել իրավիճակը սահմանին: Վստահ եմ` հարցն օրակարգում է եւ գնում է լուծման ճանապարհով»:
Մելիք-Շահնազարյանը նկատեց, որ ՌԴ նախագահը չէր ցանկանում գնահատական տալ հանդիպումներին. «Լավրովի հարցազրույցում պաշտոնական Մոսկվան իր տեսակետները հայտնեց, բայց քաղաքական խնդիր չկար, կային անվտանգությանը վերաբերող հարցեր: ՌԴ-ն շահագրգռված է լինելու թույլ չտալ պատերազմական գործողությունների վերսկսումը: Նա միջազգային հանրությանը ներկայանում է որպես մեծ խաղաղարար: ՌԴ-ի համար շատ կարեւոր է Հարավային Կովկասում լինել առավել կարեւոր գործոն: Բայց ասել, որ այս հանդիպումն առավել ձեռնտու է եղել Ռուսաստանին, քան Հայաստանին, այդպիսի գնահատականներ չէի տա»:
Կարդացեք նաև
Մելիք-Շահնազարյանը նկատեց, որ Պուտինը սկզբում հրաժեշտ տվեց Ալիեւին, ապա Սերժ Սարգսյանին, իսկ Ալիեւն ինքը քայլ արեց դեպի Սարգսյանը եւ ձեռքը պարզեց` որպես հրաժեշտի ձեռքսեղմում:
Լուիզա ՍՈՒՔԻԱՍՅԱՆ
Սանկտպետերբուրգյան հանդիպման լուսանկարները` Մելիք-Շահնազարյանի ֆեյսբուքյան էջից:
