Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստին ադրբեջանական պատվիրակության անդամները կրկին մեղադրանքներ տեղացին Հայաստանի հասցեին, ու ևս մեկ անգամ փորձեցին ղարաբաղյան հակամարտության կարգավորումը տեղափոխել այլ ձևաչափ:
Օրինակ` ադրբեջանցի պատվիրակներից Գանիրա Փաշաևան, հիշատակելով վեհաժողովի ընդունած «Ադրբեջանի սահմանամերձ շրջանների բնակիչները միտումնավոր զրկված են ջրից» վերնագրով զեկույցը, որով իբր ՀՀ իշխանություններին կոչ է արվում դադարեցնել օգտագործել ջրային ռեսուրսները քաղաքական նպատակով, դժգոհություն հայտնեց, թե իբր ՀՀ իշխանությունները որևէ քայլ չեն կատարել այդ ուղղությամբ, ուստի կոչով դիմում է ԵԽ գլխավոր քարտուղարին նպաստել այս խնդրի կարգավորմանը:
ԵԽ գլխավոր քարտուղար Թորբյորն Յագլանդը պատասխանեց` հիշեցնելով, որ Ղարաբաղյան հակամարտության կարգավորումը ԵԽԽՎ մանդատը չէ. «Ես կարող եմ կրկնել այն, ինչ բազմիցս ասել եմ. մենք դերակատարություն չունենք հիմնախնդրի կարգավորման հարցում: Իսկ Ձեր հնչեցրած հարցն այդ մասին է, ինչի մանդատը մենք չունենք: Բազմաթիվ անգամներ ես հայտարարել եմ, որ այդ խնդրի կարգավորումը ստանձնել է Մինսկի խումբը, և դրսից որևէ ներգործություն անհրաժեշտ չէ:
Մենք պետք է հարգանքով մոտենանք նրանց աշխատանքին: Եթե մեր կառույցին դիմեն, որպեսզի մենք ներգրավվենք Մինսկի խմբի աշխատանքներում, դա կանենք, բայց նման բան չի եղել, ուստի անհրաժեշտություն չեմ տեսնում, որպեսզի ԵԽ-ն խառնվի ու խնդիրներ ստեղծի գործընթացի բնականոն ընթացքի համար»:
Կարդացեք նաև
Տաթև ՀԱՐՈՒԹՅՈՒՆՅԱՆ
