«Լուսավոր Հայաստան» կուսակցության խորհրդի անդամ Մանե Թանդիլյանի համոզմամբ, անթույլատրելի է հարկային օրենսգրքի նախագիծը արտահերթ ռեժիմով քննարկել ԱԺ-ում, որովհետեւ, ըստ նրա, այն բավականին լայնածավալ է ու ուսումնասիրելու համար երկար ժամանակ է պետք:
Նրան նաեւ զարմացնում է, որ լայնածավալ քննադատություններից հետո նախագծին առաջին ընթերցմամբ կողմ քվեարկեցին շատերը:
«Եթե այդքան վտանգավոր և խնդրահարույց է օրենսգրքի նախագիծը, ապա չի կարելի այսպիսի անպատասխանատու վերաբերմունք ցուցաբերել օրենսդրին»,- այսօր «Տեսակետ» ակումբում ասաց Մանե Թանդիլյանը՝ պնդելով, որ այդ կերպ նսեմացվում է օրենսդիր մարմնի գործունեությունը:
Նրա խոսքով, եթե օրենսգիրքն ընդունվի, ապա ՓՄՁ-ները կնվազեն՝ հարկային մարմնին լայն գործառույթներ տալու պատճառով.
Կարդացեք նաև
«Այս օրենսգիրքը չի կարող նպաստել ներդրումային բիզնեսի զարգացմանը, և օրենսգրքում այնպիսի վտանգավոր դրույթներ կան, որ անհնար է, որ ընդվզում չառաջացնի»:
Նա նաեւ կարծիք հայտնեց, որ օրենսգրքի նախագիծը պետք է հետ կանչվի, որովհետեւ. «Տնտեսվարողները պետք է պաշտպանված լինեն օրենքով, սակայն այս նախագծով այդպես չէ»,- ասաց նա:
Արփինե ՍԻՄՈՆՅԱՆ
