Գինեկոլոգը խնդրի դեմ պայքարն առաջին հերթին տեսնում է բժիշկների կողմից
«Հայաստանում շատ հաճախ հղիության արհեստական ընդհատումը (աբորտ) պայմանավորված է լինում պտղի սեռով: Այն որոշելու եղանակները գնալով շատանում են: Դրա հետևանքով ավելանում են նաև հղիության ընդհատման դեպքերը, որոնց դեմ պետք է պայքարել»,- «Երկու երես» մամուլի ակումբում այսօր լրագրողների հետ հանդիպման ժամանակ ասաց մանկաբարձ-գինեկոլոգ Գեորգի Պողոսյանը:
Կարելի է արգելել ուլտրաձայնային քննություն կատարողներին ասել սեռը կամ բժիշկների նկատմամբ պատժամիջոցներ կիրառել, բայց այս մեթոդները, ըստ նրա, այնքան էլ արդյունավետ չեն:
Գինեկոլոգը խնդրի դեմ պայքարն առաջին հերթին տեսնում է բժիշկների կողմից. «Չպետք է թողնեն ընդհատել հատկապես առաջին հղիությունը, բացատրեն, որ այն իր հետ շատ բարդություններ է բերում: Օրինակ՝ օրգանիզմն սթրես է ապրում, բորբոքային հիվանդություններ են զարգանում, էնդոկրին համակարգի խախտումներ են լինում և այլն: Հղիության ընդհատման անվնաս մեթոդ չկա»,- ընդգծեց Պողոսյանը:
Կարդացեք նաև
Մասնագետի խոսքով՝ հղիության արհեստական ընդհատման կարելի է դիմել միայն այն դեպքում, երբ կա հիվանդ երեխա ունենալու վտանգ, կամ, երբ մայրն առողջական այնպիսի խնդիրներ ունի, որ նրան չի թույլատրվում ծննդաբերել: Մինչդեռ, կանայք հաճախ ընդհատում են հղիությունը ամենատարբեր պատճառներով ու եղանակներով:
«Հղիությունն ընդհատելու համար երբեմն դեղատներից գնում են դեղեր, որոնք իրականում ստամոքսի համար են նախատեսված, և անպատասխանատու կերպով փորձում են տնային պայմաններում ընդհատել հղիությունը: Արդյունքում ուժեղ արյունահոսությամբ գալիս են հիվանդանոց»,- ասաց Պողոսյանը:
Սիրանուշ ՀԱՅՐԱՊԵՏՅԱՆ
