Արճիսի բնակիչներ են մեկնել Իմերի
Տավուշի մարզի Արճիս գյուղի 22-ամյա բնակիչ Արեն Մուսայելյանը հունիսի 16-ին «ՎԱԶ-21-011» մակնիշի ավտոմեքենայով ընկել է Դեբեդ գետը: Նա Այրում քաղաքից մեկնել է երկաթուղային Այրում կայարան, սակայն կայարան տանող կամրջին չհասած՝ մեքենայով ընկել է Դեբեդը: Արճիսի գյուղապետ Սեյրան Միկիչյանն ասաց, որ Արեն Մուսայելյանն անփորձ վարորդ էր, նա վարել է իր ընկերոջ հոր ավտոմեքենան: Ավտոմեքենայի տերը վերջերս է մահացել: Ա. Մուսայելյանն ամուսնացած չէ, ունի ծնողներ, ուսանող եղբայր: Վարորդական փորձ չունենալը, ասֆալտի թաց լինելը ճակատագրական են եղել երիտասարդի համար:
Գյուղապետը հայտնեց , որ հունիսի 17-ին Սեւանից ջրասուզակներ են եկել, սակայն Դեբեդը վարարած է, նրանք չեն կարողանում ջուրը մտնել: Ս. Միկիչյանն ասաց, որ 3 տեղ՝ Այրումի կամրջի, Այրումի եւ Պտղավանի ամբարտակների մոտ Դեբեդի հոսքը շրջապտույտ է, հավանական է, որ այդ տեղերից մեկում կարող է գտնվել ավտոմեքենան: Արճիսի բնակիչներ են մեկնել Վրաստանի Իմերի բնակավայր, ուր Դեբեդի հունը լայն է, գետն այնտեղ փռվում է: Ս. Միկիչյանն ասաց, որ հարկ եղած դեպքում իր համագյուղացիները նորից այնտեղ կմեկնեն:
Ոսկան ՍԱՐԳՍՅԱՆ
