Եվրամիությունը որոշում է կայացրել երկարաձգել Ռուսաստանի Դաշնության հանդեպ սահմանված պատժամիջոցները՝ Ղրիմի հարցում որդեգրած դիրքորոշումը պահպանելու համար։ Այս մասին տեղեկացնում է ռուսական «ՏԱՍՍ» լրատվական գործակալությունը։
Պատժամիջոցների նոր փուլն ուժի մեջ է մտել 2016թ. հունիսի 17-ին և կտևի մինչև 2017թ. հունիսի 23-ը։ Սահմանված պատժամիջոցների համաձայն՝ Ղրիմի թերակղզուց արգելվում է որևէ տեսակի արտադրանք ներկրել Եվրոպա, իսկ եվրոպական որևէ պետություն իրավունք չունի ներդրում կատարել թերակղզում, ձեռք բերել անշարժ գույք, ֆինանսավորել որևէ բիզնես նախագիծ։ Պատժամիջոցները սահմանում են նաև, որ եվրոպական պետություններին պատկանող նավերն իրավունք չունեն ղրիմյան նավահանգիստներ գնալ՝ բացառությամբ արտակարգ դեպքերի։
Տեղեկացնենք, որ Ռուսաստանի Դաշնության հանդեպ սահմանված Եվրամիություն պատժամիջոցները ներառում են 3 տարբեր ուղղություն՝ Ռուսաստանի Դաշնության քաղաքացիների համար վիզային սահմանափակումներ, տնտեսական պատժամիջոցներ ռուսական պետական մի շարք կազմակերպությունների հանդեպ, ինչպես նաև Ղրիմի հանդեպ սահմանափակիչ գործողություններ։
