Ամարասցիների քայլերգը ծնվել է այս տարվա մայիս ամսին, Արցախում տեղակայված Ամարասի Արթուրի կազմած եւ նրա հրամանատարությամբ գործող ջոկատի զբաղեցրած մարտական դիրքերում: Հայաստանի տարբեր մարզերից եւ Երեւանից հավաքագրված 100 հայ քաջորդիք՝ իրենց հրամանատարի ղեկավարությամբ, կամավոր մեկնեցին Արցախ՝ օգնելու մեր եղբայրներին ու սաստելու չափը կորցրած թշնամուն:
Մնացին Արցախում, մինչեւ որ իրավիճակը համեմատաբար խաղաղվեց եւ հետ վերադարձան… Իսկ երգը ծնվեց այսպես: Ջոկատի հրամանատար, գնդապետ Արթուր Ալեքսանյանը շտաբի պետ, փոխգնդապետ Արգիշտի Շամիրյանին հանձնարարեց Ամարասի ջոկատի համար ընտրել որեւէ հայրենասիրական երգ, որպես շարային քայլերգ: Շտաբի պետն այս հարցով դիմեց ջոկատի կազմում գտնվող պահեստազորի սպա Նորայր Շահբազյանին, քանի որ վերջինս քաղաքացիական մասնագիտությամբ երաժիշտ-մանկավարժ է եւ աշխատում է Երեւանի պետական համալսարանի մշակույթի կենտրոնում՝ որպես խմբավար:
Չկարողանալով ջոկատին համապատասխան քայլերգ ընտրել՝ Շահբազյանը հրամանատարի ու շտաբի պետի հավանությամբ, որոշեց ինքը գրել այդ քայլերգը եւ ահա ունենք մարտական դիրքերում ծնված կամավորականի երգը՝ «Ամարասցիների քայլերգը»:
«Առավոտ»
17.06.2016
