«Շուշիի առանձնակի գումարտակի ազատամարտիկների միավորում» հասարակական կազմակերպության անդամները դիմում են Պաշտպանության նախարարությանը` իրենց նյութատեխնիկական աջակցություն ցուցաբերելու համար:
«Նոյյան տապան» մամուլի ակումբում լրագրողների հետ հանդիպմանը նրանք զգուշացրին, որ եթե չլինի այդ աջակցությունը, իրենք ոտքի են հանելու ժողովրդին:
«Շուշիի առանձնակի գումարտակի ազատամարտիկների միավորում» հասարակական կազմակերպության նախաձեռնության կամավորական գործընթացի համակարգող-անդամ, ազատամարտիկ Պավլիկ Մանուկյանը շեշտեց, որ իրենք պատրաստ են ազատագրել Թալիշը և մյուս կորցրած դիրքերը. «Այսօր Թալիշը գտնվում է հակառակորդի կրակի տակ: Մենք պատրաստ ենք ազատագրել Թալիշը, նաև այն բարձունքները, որոնք գտնվում են հակառակորդի ձեռքում, ինչը թույլ չի տալիս բնակչությանը վերադառնալ այդ տարածքներ»:
Պարոն Մանուկյանը տեղեկացրեց, որ իրենց նախաձեռնությանը միացել ու կամավորագրվել են անգամ աղջիկները, սփյուռքում ապրող մեր հայրենակիցները, գիտնականներ: Պավլիկ Մանուկյանը նշեց. «Մենք այսօրվա դրությամբ զինտեխնիկա, տարբեր միջոցներ չունենք բացի հերոսական կամքից, մնացածի համար պետությունից ենք աջակցություն խնդրում: Բայց դեռ արձագանք չկա. անձամբ եմ խոսել պաշտպանության նախարարի հետ, բայց հրաժարվել է հանդիպումից` պատճառաբանելով զբաղվածությունը»:
Կարդացեք նաև
Պավլիկ Մուրադյանը նշեց, որ իրենք 10-15 օրվա ընթացքում ակնկալում են պատասխան:
Նա շեշտեց, թե մարտական գործողությունները վերցնում են իրենց վրա, բայց ճակատային գծից հանելու են բոլոր այն տղաներին, որոնք սերունդ չեն տվել: Ազատամարտիկը հավելեց. «Մենք գնում ենք պատերազմը վերջացնելու, ոչ թե զինադադար բերելու»: Պավլիկ Մուրադյանը հիշեցրեց, թե երկու տարի է իրենք զգուշացնում են այս արհավիրքի մասին, բայց ոչ մի արձագանք. «Այսօր Ժիրոյի գումարտակը կրակ է խնդրում: Եթե դուք չհասնեք մեզ, մեկ է` կրակը թափվելու է, և Աստծո կրակն է թափվելու մեր ժողովրդի գլխի»:
Նշենք, որ Շուշիի առանձնակի գումարտակի ազատամարտիկները Թալիշն ազատագրելու պլան են մշակել, որը երբեք չի օգտագործվել:
«Հետախույզ վետերանների միավորման» ՀԿ նախագահ Սուրեն Կարապետյանը նշեց. «Պետական մարմիններն ակտիվ գործողություններ չեն կատարում պաշտպանության համար. նրանք զբաղված են ընտրական և հարկային օրենսգրքի ընդունմամբ: Մենք մշակել ենք նոր մարտավարական ձև, որը երբևէ չի կիրառվել: Դա կարող ենք տրամադրել նաև պաշտպանության նախարարությանը, եթե համաձայնեն համագործակցել»:
Ազատամարտիկ Արայիկ Խանդոյանը վրդովված է «անպետք հող» արտահայտությունից. «Զինվորն ասում է` ո՞նց կարող եմ նստել այստեղ, ու վաղը գան իմ եղբորը, սպային մորթեն, հետո էլ ասեն անպետք հող: Ոչ ոք բարոյական իրավունք չունի ասելու` սա անպետք հող է»:
Նախաձեռնության անդամ Գագիկ Արծրունին արձանագրեց, որ կորցրած տարածքները հետ բերելու համար հնչող հուսադրող հայտարարությունները գործնականում չիրագործվեցին: Նա նաև նշեց, որ թե ինչ վտանգներ է պարունակում այդ հողերը Ադրբեջանին թողնելը. «Ադրբեջանի մոտ հավատ առաջացավ, որ ռազմական ճանապարհով կարող են տարածքներ վերցնել, մյուս կողմից սա ազդում է զինվորի հոգեբանության վրա: Եզակի դեպք է, երբ բանակն ու ժողովուրդը պատրաստ են, բայց երկրի ղեկավարությունը թույլ չի տալիս հողերն ազատագրելու համար գործողություններ իրականացնել»:
Լուսանկարը` «Նոյյան տապան»-ի
Տաթև ՀԱՐՈՒԹՅՈՒՆՅԱՆ
