Այսօրվանից Գյումրիում մեկնարկել է փողոցաշինությունը, սակայն այս անգամ, ինչպես վստահեցնում է Գյումրու քաղաքապետ Սամվել Բալասանյանը՝ նոր ու ոչ ծախսատար տեխնոլոգիայի կիրառմամբ: Նոր կամ կարելի է ասել բետոնային տեխնոլոգիան փորձարկվում է Գյումրու Մադոյան փողոցի մի հատվածի վրա. հատուկ մեքենայի միջոցով մշակվում է փողոցի գրունտային շերտը, որին ավելացվում է ցեմենտային խառնուրդը՝ հենց տեղում ստանալով 98 տոկոսանոց բետոնային շերտ: Բետոնի չորանալուց հետո այն պատվում է շատ բարակ՝ 4 սանտիմետրանոց ասֆալտի շերտով:
Գյումրու քաղաքապետը նաեւ վստահեցնում է, որ փողոցաշինության այս մեխանիզմը՝ ի տարբերություն քարապատման, շատ արագ է տեւում ու բավական հարմար տարբերակ է: «Ավելի էժան է, քան քարը, կարելի է այսպես ասել: Չենք ասֆալտապատելու, վրայի շերտը կլինի բետոնային, տեսնենք ոնց կարդարացնի իրեն Գյումրիի պայմաններում»,- ասում է Գյումրու քաղաքապետը: Նա նշում է, որ մինչեւ չտեսնեն այս մեկի արդյունքը, տեխնոլոգիան չեն կիրառի մյուս փողոցներում:
Նունե ԱՐԵՎՇԱՏՅԱՆ
